Intersindical Asturiana intensifica la so campaña en defensa de la universidá pública frente al avance de les universidaes privaes n’Asturies
Ciscu del cómic
Les secciones d’Educación de la Intersindical Asturiana, Izquierda Sindical Asturiana (ISA) y SUATEA, siguen reforzando la so campaña en defensa de la universidá pública énte la implantación de nueves universidaes privaes n’Asturies. La Universidá Nebrija, la Universidá Alfonso X el Sabiu y la Universidá Europea tienen yá vía llibre pa establecese nel país, una situación que xeneró una notable controversia social y que topó cola oposición espresa de dambes organizaciones sindicales.
Dende Intersindical Asturiana consideren que la espansión de la ufierta universitaria privada responde a una lóxica de mercantilización de la educación superior, convirtiendo un derechu social nun negociu y favoreciendo un modelu cada vez más segregador. Al so xuiciu, estes instituciones nun complementen el sistema públicu, sinón que compiten por recursos, alumnáu y titulaciones, contribuyendo a una progresiva privatización d’un serviciu que consideren esencial pa la cohesión social, la igualdá d’oportunidaes y el desendolcu d’Asturies.
Nel marcu d’esta campaña, les organizaciones sindicales presentaron un informe sobre la ofensiva de les universidaes privaes n’Asturies col envís d’apurrir datos, argumentos y ferramientes pal alderique públicu. Amás, impulsaron delles actuaciones xurídiques y presentaron recursos contra los procedimientos rellacionaos cola implantación d’estos proyectos universitarios.
Según señalen, estes iniciatives busquen denunciar la falta d’una planificación universitaria orientada al interés xeneral y alvertir sobre les consecuencies que puede tener la creciente privatización de la enseñanza superior. Nesti sen, caltienen que la proliferación d’universidaes privaes favorez la desigualdá nel accesu a determinaos estudios en función de la capacidá económica de les families.
Como continuación de la campaña informativa, Intersindical Asturiana ellaboró un cómic divulgativu dirixíu al alumnáu que remata’l Bachilleratu y s’enfrenta estos díes a la Preba d’Accesu a la Universidá (PAU). El material pretende poner en valor les fortalezes de la universidá pública y ufiertar información crítica sobre les implicaciones académiques, sociales y económiques que puede tener cursar estudios nuna universidá privada.
El cómic va distribuyise nes distintes sedes onde se celebren les prebes d’accesu a la universidá.
This work is licensed under a Creative Commons Attribution 4.0 International License.
