La Confederación Hidrográfica del Cantábricu sancionó al Real Club de Golf de Castiello pol aprovechamientu d’agua del regatu Meredal, na parroquia de Vega (Xixón), un fechu que la Coordinadora Ecoloxista d’Asturies venía denunciando dende va tiempu por considerar que taba afectando a un cursu fluvial que sufre episodios de seca durante una parte importante del añu.

Campu golf de Castiello

Coordinadora Ecoloxista valoró positivamente que la Confederación Hidrográfica fuere quien a identificar a los responsables de les captaciones d’agua del calce. L’entidá recuerda que llevaba tiempu denunciando estes práutiques y critica la pasividá de les alministraciones, a les que acusa de mirar pa otru llau pese a la situación que vien careciendo’l regueru.

El regatu Meredal ye’l principal afluente del ríu Piles, precisamente cuando les alministraciones tán destinando millones d’euros públicos a proyectos de recuperación de la biodiversidá nel tramu baxu d’esti sistema fluvial.

Dende la organización ecoloxista recuerden que les poblaciones de salmónidos de los ríos asturianos tán nuna clara regresión por causa de múltiples factores ambientales y consideren que les captaciones d’agua d’esti tipu contribúin a agravar la situación y a acelerar el so declive.

La Coordinadora señala tamién l’eleváu consumu d’agua asociáu a los campos de golf, basaos en grandes estensiones de céspede que precisen importantes volúmenes hídricos pal so caltenimientu. Un consumu que se dispara nos periodos más soleyaos, cuando les precipitaciones son escases y les pérdides por evaporación aumenten considerablemente.

Nesti sen recuerden qu’Asturies cuenta anguañu con quince campos de golf en furrulamientu, instalaciones que, al so xuiciu, xeneren un impactu ambiental considerable sobre’l so entornu.

La organización considera que’l cambéu climáticu agrava entá más esta problemática. L’aumentu de les temperatures y la progresiva reducción de les precipitaciones incrementen la presión sobre los recursos hídricos y faen más cuestionable’l consumu intensivu d’agua asociáu a esti tipu d’instalaciones.

Amás del consumu hídricu, la Coordinadora vien denunciando dende va años los efectos derivaos del usu intensivu de fertilizantes, insecticides, herbicides y fungicides nos campos de golf. Productos que pueden resultar perxudiciales pa la fauna y la flora y que, al traviés de la escorrentía superficial, acaben contaminando regueros, cursos d’agua y otros ecosistemes cercanos.

Los ecoloxistes sostienen que la sanción impuesta pola Confederación Hidrográfica del Cantábricu debería sirvir para reforzar la vixilancia sobre esti tipu d’actuaciones y evitar nueves afecciones a unos ecosistemes fluviales que yá soporten una creciente presión ambiental.

This work is licensed under a Creative Commons Attribution 4.0 International License.