Los caberos datos del INE asoleyen un afondamientu na fienda que dexa’l nivel de vida y la capacidá adquisitiva n’Asturies mui perbaxo del estatal

Comparativa pente les medies d’Asturies y España

Mientres el costu de la vivienda sigue disparándose mui perriba de la media estatal, los salarios asturianos son de los que menos medren de tol país. El resultáu ye una pérdida progresiva de poder adquisitivu que afecta especialmente a les clases trabayadores y a la mocedá que intenta emancipase.

Los datos son especialmente reveladores. Nos dos caberos años, el preciu de la vivienda medró n’Asturies un 27,8 %, frente al 20 % rexistráu nel conxuntu del Estáu. Ye dicir, la vivienda encarecióse nel Principáu casi un 40 % más rápido que na media española.

L’alimentación tamién siguió una tendencia alcista, anque muncho más moderada. Los precios alimentarios aumentaron un 3,1 % n’Asturies, frente al 2,8 % estatal; eso ye un 10,7 % más que nel conxuntu del Estáu. 

Frente a estos incrementos, los salarios avanzaron a un ritmu claramente insuficiente. Según la Encuesta Anual d’Estructura Salarial del INE, los sueldos medraron n’Asturies namái un 2,3 % durante 2024, menos de la metá del 5,3 % rexistráu nel conxuntu d’España. Namái Cantabria presentó una evolución peor, con un 3%. Mientres la Comunidad de Madrid rexistró un aumentu del 6,8 % y la media estatal algamó’l 5,3 %, Asturies quedó varada nun modestu 2,3 %. La siguiente menor subida, la de Castiella y Llión, yá s’asitiaba nun 3,8 %, bien perriba de la asturiana.

La consecuencia ye clara: mientres la vivienda acumulaba una medría del 27,8 % en dos años, los salarios apenas avanzaben un 2,3 % nel últimu exerciciu disponible. La brecha ente ingresos y gastos básicos sigue agrandándose.

Amás, la evolución salarial parte d’una posición que tampoco ye especialmente ventaxosa. El salariu mediu añal n’Asturies nel 2024 asitióse en 28.562 euros brutos, perbaxo de la media estatal, que llegó a los 29.540 euros.

Más reveladora entá ye la mediana salarial, que retrata meyor la realidá cotidiana de la mayoría de los trabayadores. La mediana n’Asturies ye de 1.728 euros brutos mensuales, alredor de 1.400 euros netos. Esto significa que la metá de los asalariaos cobra menos d’esa cantidá. De fechu, la metá de los trabayadores asturianos percibió menos de 1.612 euros netos al mes en doce pagues. Nel estremu opuestu, namái un 10 % supera los 3.000 euros netos mensuales, mientres otru 10 % nun llega nin siquiera a los 800 euros.

Los datos ponen tamién de manifiestu que la “recuperación económica” nun beneficia a toos por igual. Les muyeres siguen cobrando alredor de 600 euros menos al mes que los homes, una diferencia que sigue siendo una de les asignatures pendientes del mercáu llaboral asturianu.

Esta situación coincide, amás, con un modelu económicu que dende va años apuesta pola hostelería y los servicios venceyaos al turismu. Precisamente esti sector presenta los salarios más baxos y les peores condiciones llaborales del mercáu, con retribuciones que raramente superen el Salariu Mínimu Interprofesional.

Asina, mientres se promociona un modelu económicu basáu en sectores de baxu valor añedíu y salarios conteníos, la vivienda sigue encareciéndose a ritmos propios de mercaos con mayor dinamismu económicu y niveles salariales muncho más altos.

La consecuencia ye una contradicción cada vez más difícil de caltener: Asturies tien una vivienda que medra perriba de la media española y unos salarios que medren menos de la metá que nel restu del país. Una combinación que castiga especialmente a les families trabayadores y que fai cada vez más difícil acceder a una vivienda, aforrar o construyir un proyectu de vida estable.

This work is licensed under a Creative Commons Attribution 4.0 International License.