El Gobiernu d’Asturies anunció una midida que, a primer vista, paez difícil de criticar. A partir del cursu 2026-2027, la gratuidá de la matrícula universitaria va estendese a tol alumnáu de grau de la Universidá d’Uviéu. El titular suena bien. Mui bien. Universidá de baldre pa toos. Igualdá d’oportunidaes. Accesu universal a la educación cimera.

Sicasí, abonda con mirar un poco más allá del titular pa decatase de que la realidá ye bien distinta de la imaxe que se pretende tresmitir.

La clave ta nun detalle que pasa casi desapercibíu. El Principáu va asumir el costu de la matrícula únicamente del alumnáu que nun tenga derechu a la beca del Ministeriu d’Educación. Quien sí cumpla los requisitos económicos pa recibir una beca va siguir teniendo la matrícula cubierta pol Estáu, exactamente igual que hasta agora. Les dos ayudes nun son compatibles nin s’acumulen.

Traducíu a un llinguaxe más claru: los estudiantes con menos recursos nun van recibir nin un euru más que recibíen hasta agora. La novedá consiste en que l’Alministración autonómica va pagar la matrícula de quien, precisamente por tener una situación económica más favorable, nun tien derechu a beca.

Dicho d’otra manera: la midida nun amplía les ayudes a quien más les necesita. Nun aumenta les cuantíes destinaes a manutención, tresporte o material d’estudiu. Nun permite qu’un estudiante becáu pueda destinar l’importe de la matrícula a otros gastos venceyaos a la so formación. Nun meyora les condiciones materiales de quien más dificultaes atopa pa llegar a la universidá o pa permanecer nella.

Lo que fai ye asumir con dineru públicu un gastu -de más de cuatro millones d’euros- que, hasta agora, corría a cargu de families con ingresos abondo altos como para quedar fuera de los requisitos de les beques.

Por supuestu, naide niega que cursar estudios universitarios suponga un esfuerciu económicu pa munches families de clase media. Pero convién llamar a les coses pol so nome. Esta nun ye una política redistributiva. Nun ye una midida diseñada pa correxir desigualdaes sociales. Nun ye una ayuda dirixida a quien más dificultaes tien pa acceder a la educación cimera.

Ye, precisamente, lo contrario.

Mentanto los estudiantes de rentes baxes van siguir recibiendo exactamente les mesmes ayudes qu’hasta agora, el dineru nuevu que va poner l’Alministración va dir destináu a cubrir un gastu de quien yá taba en condiciones de pagalu.

Resulta llamativu que, nun momentu nel que munchos mozos y moces tienen dificultaes pa pagar una habitación, afrontar los gastos de tresporte o cubrir les necesidaes más básiques pa estudiar, se destinen millones d’euros a financiar un costu que yá podíen asumir les families con mayor capacidá económica.

Porque’l principal problema de munchos estudiantes nun ye la matrícula. Esa yá ta cubierta poles beques cuando esiste una necesidá económica acreditada. El verdaderu problema ye poder caltenese na universidá. Pagar un alquiler. Costear los desplazamientos. Mercar material. Evitar tener que compaxinar estudios y xornaes llaborales incompatibles con un bon rendimientu académicu.

Si l’oxetivu fuera realmente favorecer la igualdá d’oportunidaes, los recursos públicos podríen destinase a reforzar les beques de residencia, aumentar les ayudes al tresporte, crear programes específicos pa estudiantes de rentes baxes o ampliar les cuantíes de les beques esistentes; concentrar los recursos públicos precisamente en quien más los necesita.

La gratuidá universal de la matrícula permite, en cambéu, presentar una gran conquista social ensin modificar de manera significativa les desigualdaes reales. Proyeuta una imaxe de progresu y universalidá, pero’l gastu adicional termina beneficiando, fundamentalmente, a quien quedó fuera de los criterios de necesidá económica.

Per otru llau, la matrícula de baldre estiéndese a tolos matriculaos na Universidá d’Uviéu, ensin consideración al orixe de los estudiantes, lo qu’ensin dubia supondrá un efeutu llamada a universitarios de tol estáu, amenorgando les places disponibles pa los asturianos. 

This work is licensed under a Creative Commons Attribution 4.0 International License.