Mientres les alministraciones sigan ensin acompasar la creación de places cola demanda real, cientos de families van siguir enfrentándose cada cursu al mesmu problema: buscar alternatives privaes que nun siempre pueden pagar o recurrir a la rede familiar como única solución posible pa conciliar trabayu y crianza

Pa munches families, les escuelines constitúin la única posibilidá real de conciliación. Nun contestu económicu nel que son necesarios dos sueldos por familia pa llegar a fin de mes, la falta de places convierte’l curiáu de la reciella nun problema difícilmente resoluble ensin sofitu esternu.Les escuelines dexaron de ser un serviciu complementariu pa convertise nuna infraestructura básica de bientar social, cuando una familia nun puede acceder a una plaza, nun solo pierde un serviciu educativu: pierde una ferramienta fundamental pa poder trabayar y conciliar.

La consecuencia ye que la reciella acaba convirtiéndose na primer víctima d’un sistema que reclama’l tiempu de los adultos comu man d’obra pero qu’al tiempu ye incapaz d’atender les necesidaes de les próximes xeneraciones. 

En Siero, la espublización de les llistes provisionales d’admisión nes escuelines de 0 a 3 años de Siero dexó una cifra que vuelve poner enriba la mesa les enormes dificultaes de conciliación que sufren les families asturianes: 221 solicitúes quedaron ensin plaza nos cuatro centros del conceyu.La situación más preocupante rexístrase na Pola. Na escuelina autonómica de Los Polesinos, inaugurada nel mes de payares nel antiguu Cinema Siero, les llistes provisionales dexaen 63 solicitúes ensin atender. La situación llevó a les families a reclamar a la Conseyería d’Educación l’apertura d’una segunda llinia nel centru, lo que permitiría incorporar alredor de 39 places nueves.

Na escuelina municipal d’El Carmín quedaron 59 solicitúes en llista d’espera, ente que Los Polesinos suma otres 63. La situación nun ye meyor en Lugones. Na escuelina municipal de La Manzana quedaron 44 solicitúes ensin plaza y na autonómica Mundo Feliz la llista d’espera asciende a 55. N’algunes unidaes hai más de trenta solicitúes compitiendo por namái dos o cuatro vacantes.

Lo qu’estes cifres ponen de manifiestu ye que la estensión de la rede pública de 0 a 3 años sigue ensin responder a les necesidaes reales de les families.

This work is licensed under a Creative Commons Attribution 4.0 International License.