Beneros caltién la tradición del llabor compartíu y convoca una Sestaferia pa llimpiar y meyorar el pueblu anantes de les sos fiestes
Les sestaferies y les andeches son formes tradicionales d’organización comunal que recueyen una parte fundamental del calter y la idiosincrasia asturiana: trabayar xuntos pol bien común, ensin compensación económica y reforzando los venceyos sociales. Trátase d’una manera d’entender la vida colectiva na que’l sofitu mutuu y la colaboración formen parte del díi ente díi.
Esti espíritu tamién s’atopa en munches celebraciones populares, onde’l fechu de compartir ye central: dende’l magüestu hasta la esfoyaza o les espiches. Compartir, collaborar y caltener vivos los vezos que son parte de la identidá del país ye imprescindible p’algamar un futuru nel que sigamos siendo.
Nesti contestu, la Comisión de Festexos de Beneros convoca una sestaferia pal próximu 2 de mayo, cola intención d’acuriosar y meyorar el pueblu de cara a les fiestes de San Isidro. La xornada va entamar a las 10:30 hores y ta abierta a la participación de tolos vecinos y vecines que quieran echar un gabitu.
Dende la organización señalen que l’asistencia nun ye obligatoria, pero destaquen que toa ayuda suma y ye bien recibida. Como ye vezu, la xornada va rematar con una espicha ‘de traxe’, na que cada participante va apurrir daqué pa comer, reforzando asina’l calter colectivu y festivu de la iniciativa.
This work is licensed under a Creative Commons Attribution 4.0 International License.
