El pesu de les segundes residencies (más del 40% del total) ya’l xorreciente interés de compradores foriatos tensiona’l mercau de la vivienda en Villaviciosa, con cuasi la metá destináu a vivir menos d’un mes al añu

Inmobiliaria alemana en Villaviciosa

Alredor de tres millones d’españoles y 80 millones d’europeos tienen una segunda vivienda, ello ye, una casa distinta d’aquella na que residen de manera habitual y que s’utiliza xeneralmente pa vacaciones o tiempu d’ociu. Alrodiu de 5.000 d’eses viviendes tan en Villaviciosa.

El parque residencial maliayés ronda les 12.000 viviendes. D’elles, menos del 60 % correspuende a viviendes avezaes, ente que más del 40 % restante son segundes residencies o viviendes venceyaes a herencies familiares que permanecen vacies la mayor parte l’añu.

Esto supón que nel conceyu hai alredor de 5.000 viviendes destinaes a segunda residencia, una cifra elevada si se tien en cuenta’l tamañu del conceyu. A esi volumen hai que sumar, amás, cientos de viviendes turístiques n’alquiler, tanto rexistraes oficialmente como otres que funcionen fora del marcu llegal. l’8’5% de los compradores de vivienda en Villaviciosa son foriatos de fuera l’estáu. 

Dende’l puntu de vista de dellos analistes del sector inmobiliariu, esti eleváu pesu de les segundes residencies tien un impactu direutu nel comportamientu del mercáu llocal.

El resultáu d’esti escenariu ta viéndose reflexáu nos precios. Nel últimu añu, la vivienda n’Villaviciosa subió alredor d’un 11 %. Anguaño, el preciu mediu d’una vivienda nel conceyu ronda los 163.000 euros, teniendo en cuenta tanto pisos como cases unifamiliares. En términos de superficie, el valor mediu sitúase en 1.217 euros el metru cuadráu. La situación ye más acusada nel casu de los pisos, onde’l preciu algama una media de 1.795 euros el metru cuadráu.Otra de les consecuencies d’estes residencies ye dexar, lliteralmente, medio vacíu el conceyu la mayor parte del añu, lo que repercute negativamente n’actividá económica, cultural y social del mesmu.

Anque Villaviciosa nun s’atopa ente los conceyos más tensionaos turísticamente d’Asturies, el crecimientu de les segundes residencies, l’aumentu del comprador estranxeru y la presencia de viviendes turístiques tán configurando un mercáu cada vegada más competitivu nun conceyu que se consolida como unu de los destinos residenciales más demandaos de la costa asturiana.