La plataforma Horru Online, dedicada a la defensa, catalogación y espardimientu del patrimoniu formáu por horros, paneres y cabazos n’Asturies, denunció públicamente la falta d’actuación de les alministraciones ante’l deterioru y esbarrumbe d’estes construcciones tradicionales.

Depués de cuasi dos años de trabayu de recoyida d’información, la organización tien rexistraos na so web más de 400 casos d’horros, paneres y cabazos en mal estáu o en riesgu d’esbarrumbe, repartíos en 43 conceyos asturianos.

Dende la plataforma recuerden que, según datos del Gobiernu d’Asturies, anguañu esisten nel país más de 20.000 horros, paneres y cabazos. Sicasí, señalen que a xineru de 2026 nun hai nengún d’estos elementos declaráu Bien d’Interés Cultural (BIC), ente que sí hai 121 ilesies con esa protección.

Horru Online critica que, a pesar de tar informaes de cientos de casos concretos al traviés de les cartes y comunicaciones que la organización unvia a les instituciones, nin el Principáu nin los conceyos tan poniendo medios efectivos pa solucionar la situación, nin siquier nos casos más graves. Amás, denuncien que les alministraciones tarden en munches ocasiones meses en retrucar a les notificaciones.

Como exemplu d’esta situación, la plataforma señala’l horru d’El Rumióu, nel conceyu de Candamo, un casu denunciáu’l 13 de xunetu de 2024 que, según indiquen, sigue esbarrumbándose cola pasividá de les alministraciones asturianes dempués de 589 díes.

Precisamente Candamo ye un de los conceyos con mayor númberu de denuncies recoyíes pola organización, con 36 casos documentaos hasta’l momentu.

Dende Horru Online alvierte que, ensin una intervención rápida y coordinada de les alministraciones, parte d’esti patrimoniu tradicional corre’l riesgu de siguir perdiéndose de manera irreversible.

Si tas esmolecíu/a pola situación de los horros/paneres/cabazos n’Asturies ya quies, bien sofitar, bien denunciar, contauta con ellos n’info@horru.online.