Ensin que cambie’l tipu d’impuestos nin la calidá del productu, repostar n’Asturies sal dende hai tiempu más caro que n’otros puntos del Estáu, non solo al conductor sinón tamién a les propies gasolineres, un agraviu qu’afeuta a éstes, a les families y tamién nel balance de les empreses, especialmente les que viven del tresporte o de la distribución.

Les cifres concretes asoleyaes estos díes son elocuentes. La diferencia coles comunidaes vecines puede algamar hasta 10 céntimos por llitru frente a territorios llende como Galicia, Cantabria o Euskadi. Esa mesma información amuesa que’l sector pide una investigación sobre por qué se-y vende carburante más caro a les estaciones asturianes y advierte del golpe económicu que supón.

Con una diferencia de 0,10 €/l, nun repostaxe corriente de 50 llitros un conductor paga alredor de 5 euros más por depósitu; cuando la escala ye profesional, el castigu dispara. Un camión que carga 1.000 llitros paga ente 50 y 100 euros de más cada vegada que reposta, cola consecuente perda de competitividá y presión sobre los costes. Pa una pequeña empresa de tresportes, el sobrecoste puede superar los 10.000 euros añales, reduciendo márxenes o treslladándose al consumidor n’incrementu de precios. 

Esi ye’l círculu viciosu: combustible más caru implica lloxística más cara; lloxística más cara implica más costes y poro, productos más caros; productos más caros impliquen menos consumu. Y n’un país onde l’actividá económica yá tien dificultaes, torgar el movimientu de persones y mercancíes ye disparase nel pie.

Cuando se trata d’apuntar a los motivos, apaecen l’aislamientu, la falta d’infraestructures y un mercáu más feble. Asturies ye de los pocos llugares peninsulares ensin conexón direuta a una rede d’oleoductos, polo que’l combustible tien de llegar per mar al puertu y depués distribuyise por carretera, con mayores costes lloxísticos. L’escasu interés del mercáu asturianu, elimina amás la competencia real: namás un 33% de les estaciones asturianes son independientes, frente a una media estatal cercana al 46%, perteneciendo mayoritariamente a dinosaurios del mercáu, con perbaxa presencia de marques “low cost”.

Esi sobrepreciu tien un efeutu direutu que agrava’l problema: cuando repostar equí ye más caro, parte del consumu marcha; munchos trasportistes escueyen repostar fuera, lo que baxa’l volume de ventes y termina dañando tamién a les estaciones del país. La mesma información fala d’una perda de recaudación pa’l Principáu cifrada por Asvecar en más de 300 millones d’euros añales, precisamente por esi tresvase de repostaxes a otros territorios.

Por eso, la cuestión de la gasolina más cara n’Asturies nun ye una simple noticia de consumu. Ye un indicador. Señala que l’aislamientu y la falta cadarmes sigue costándonos a los asturianos perres cada selmana, que la falta d’actividá y de competencia carezse tamién con consecuencies nel día a día y que la economía asturiana sigue llastrada con pagos extra.