La Coordinadora Ecoloxista d’Asturies llamenta fondamente que, pesi cumplir de llargo los requisitos, nun se incluyera la anguila nel catálogu d’especies en peligru d’estinción, como proponía’l Ministeriu de Transición Ecolóxica y Retu Demográficu

Pantalanes pa la pesca de l’angula en ríu Nalón

La propuesta d’incluyir l’anguila nel catálogu del pelligru de desaniciu nun salía de la nada: taba baseada nun informe de payares de 2025 del Conseyu Internacional pa la Esploración de la Mar (CIEM), xunto a munchos otros informes científicos que confirmen que la especie ta fuera, de sobra, de los llímites de seguridá pa la so conservación.

L’anguila europea (Anguilla anguilla) ta catalogada dende hai dos décades en pelligru críticu pola Unión Internacional pa la Conservación de la Naturaleza (UICN), la categoría de mayor menacia esistente. A pesar d’ello, sigue ensin incluyise nel Listáu d’Especies Silvestres en Protección Especial (LESPRE) como “especie en peligru d’estinción”, una midida que tendría de tomase hai tiempu, a la vista de les cifres catastrófiques de captures d’angula que, añu tres añu, evidencien el colapsu de les poblaciones.

La pesquería de l’angula caltiénse güei non porque seya caltenible, sinón xusto pola so escasez. Cuantu menos hai, más esclusivu ye’l consumu y más disparataos son los precios en rula. Presentar esto como un ésitu ye un autoengañu perversu: ye la garantía de que se va siguir pescando hasta l’esgotamientu total. Ye la lloxística del mercáu llevada al estremu, onde’l preciu sustituye a la razón y la estinción conviértese nun “coste asumible”.

Frente a esta ceguera institucional, ye xustu reconocer el posicionamientu cada vegada mayor d’asociaciones de cocineros, nacionales ya internacionales, con figures de referencia como Arzak o Subijana, que pidieron al Ministeriu la veda inmediata de la especie y la prohibición de la so comercialización, negándose a incluyir nin angula nin anguila nes cartes de los sos restoranes. Un exemplu de responsabilidá qu’otros deberíen siguir.

Pero n’Asturies, nun exerciciu d’insensibilidá ambiental propia d’otros sieglos, sigue sovencionándose y apoyándose’l festival de la angula n’San Xuan de l’Arena, un eventu que, más allá del folklor, ye un festexu anacrónicu de la estinción d’una especie.

Dende la Coordinadora Ecoloxista reclamen un paru biolóxicu incentiváu que vede la pesca de la angula darréu. La cayida continuada de los desembarcos fai cada vez más evidente lo fácil que sería declarar esa veda, que podría nun atopar una oposición real nin ente la pesca d’embarque ni dende tierra. A mediu y llargu plazu, esta midida permitiría la recuperación de la especie y de les pesqueríes asociaes, siendo realmente beneficiosa pal sector, y non al contrariu.

Los datos oficiales son elocuentes: en 2024, la pesquería de la angula en tol Estáu español supunxo ventes en rula d’un millón d’euros, y la de la anguila, unos 80.000 euros. Con eses cifres enriba la mesa —que podríen ser el tope pa financiar un paru biolóxicu incentiváu a nivel estatal— resulta imposible d’entender cómo les alministraciones son capaces de condergar a la estinción a una especie. Más entá cuando’l gastu posterior n’estudios y intentos de recuperación, cuando la anguila desapareza definitivamente, va ser muncho mayor y, dende llueu, muncho menos rentable.

La veda total tendría d’acompañase de midíes imprescindibles: meyorar l’estáu ambiental de los ríos, eliminar vertíos, frenar usos abusivos del agua, retirar o adaptar los obstáculos que torguen a les angules remontar hasta les sos zones de desarrollu, garantizar caudales ecolóxicos reales y reforciar el control del furtivismu y del tráficu illegal.

El día que la anguila s’estinga, alerten dende la coordinadora —xunto con otres especies emblemátiques de los nuesos ríos y del nuesu patrimoniu natural, como’l salmón— “la sociedá va tener drechu a esixir responsabilidades a los políticos que, cola so inacción, dexaron que pasara. Otra cosa ye que nesti país eso de reconocer responsabilidades siga ensin tar de moda. Pero la estinción nun va ser un accidente: va ser una decisión”.

Nel Dos Santos

This work is licensed under a Creative Commons Attribution 4.0 International License.