Rebelión Científica Asturies alerta de que 93 infraestructures tán en riesgu mui altu y que 30 conceyos tienen equipamientos esenciales n’árees inundables. Llangréu y Xixón encabezan la llista, mientres centros como l’Hospital de Les Arriondes yá sufrieron inundaciones repetíes ensin que s’adopten soluciones definitives
Llistáu d’infraestructures afeutaes por tipu
Asturies tien anguaño 112 infraestructures crítiques en riesgu d’inundación, d’elles 93 clasificaes como de riesgu mui altu, según los datos analizaos por Rebelión Científica Asturies, que vuelve poner el focu nuna problemática estructural que afecta de manera directa a la población más vulnerable y a servicios básicos esenciales.
L’informe identifica 45 centros educativos, 10 residencies de persones mayores, 4 campings, 2 hospitales y 8 EDAR (Estaciones Depuradores d’Aguas Residuales) asitiaos en zones con peligru altu o mui altu d’inundación. A esto súmense parques de bomberos, cuarteles de la Guardia Civil, comisaríes de policía, instalaciones industriales y centros de tresporte.
Según los datos recueyos, 30 conceyos asturianos tienen dalguna infraestructura crítica afectada. Llangréu ye’l más castigáu, con 18 instalaciones en riesgu, siguíu de Xixón, con 12, y Uviéu, con 11. Tamién destaquen Mieres, Avilés, Villaviciosa, San Martín del Rey Aurelio o Valdés.
Un casu especialmente preocupante ye’l del Hospital del Oriente de Asturias, en Les Arriondes, que yá se vio inundáu en delles ocasiones. La situación foi denunciada en múltiples momentos, ensin que se materialicen actuaciones eficaces pa evitar que vuelva repitise.
«Lo que más nos llama l’atención ye que sigue habiendo muncha población vulnerable nestes zones d’inundación, empezando poles residencies de mayores, les escueles… Ye urxente que esto se solucione yá», señala Fernando Prieto, director del Observatoriu de Sostenibilidá y participante del movimientu climáticu Rebelión Científica.
Nel ámbitu educativu, la situación ye especialmente grave: 43 escueles y 2 escuelines tán en riesgu mui altu, con centros repartíos per tol territoriu, dende la cuenca del Nalón y el Caudal hasta la zona central y l’oriente. En munchos casos trátase de colexos públicos onde acuden a diario cientos de neños y neñes.
La mesma gravedá afecta a les residencies de persones mayores, con 10 centros en riesgu mui altu, asitiaos en conceyos como Mieres, Xixón, Avilés, Aller, Castrillón, Vegadeo o Sobrescobiu, lo que xenera una alarma añadida pol grau de dependencia de les persones residentes.
Tamién resulta especialmente preocupante que servicios d’emergencia, como parques de bomberos, figuren ente les infraestructures amenazaes, lo que podría comprometer la capacidá de respuesta precisamente nos episodios d’inundación.
Dende Rebelión Científica Asturies señálase que la combinación de cambéu climáticu, urbanismu en zones inundables y falta de planificación a llargu plazu ta detrás d’esta situación, que nun ye nueva, pero que s’agrava cola repetición d’episodios de lluvies intenses.
L’organización reclama medides urxentes, dende la reubicación o proteición efectiva de les infraestructures más sensibles hasta una revisión fonda de la ordenación del territoriu, poniendo la seguridá de la población por enriba d’otros intereses.
Porque, como recuerden, nun se trata solo d’infraestructures, sinón de persones. Y munches d’elles, les más vulnerables, siguen viviendo y estudiando en zones d’altu riesgu.
Llucía Fernández
This work is licensed under a Creative Commons Attribution 4.0 International License.
