Concentración de XEGA

Mientres na mayoría del estáu lleven años con una normativa específica que protexe los drechos del colectivu LlGTBI, Asturies continúa instalada nel retrasu. El colectivu Xente Gay Astur (XEGA) volvió denunciar esta selmana una situación que califiquen d’inaceptable: el Principáu sigue ensin una llei propia que garantice la igualdá real y la non discriminación.

La organización presentó nel Edificiu Alministrativu de Servicios Múltiples les sos alegaciones al borrador del anteproyeutu ellaboráu pol Gobiernu asturianu. Trátase d’un procesu que, sobre’l papel, tendría que conducir a la aprobación d’una norma imprescindible, pero que s’allarga ensin fin. Dende XEGA confíen en que la llei pueda ver la lluz lo enantes posible, anque son conscientes de que los plazos políticos xueguen en contra.

El deséu del colectivu sería que la normativa pudiera tar aprobada pal próximu mes de xunu, coincidiendo col Día del Arguyu. Sicasí, la realidá apunta a que’l camín va ser muncho más llargu. Dende la mesma asociación alvierten de que’l procesu nun debería dilatase más allá de marzu de 2027, fecha na que previsiblemente s’abrirá un nuevu ciclu electoral que podría volver retrasalo too.

La futura llei tendría que servir pa dar cobertoria xurídica a les persones LlGTBI en tolos ámbetos: na alministración pública, na educación, na sanidá o nel mundu llaboral. Ye dicir, pa facer real eso que tantes vegaes se proclama nos discursos oficiales pero que na práctica sigue ensin desenvolvimientu normativu.

Dende XEGA recuerden que lleven más de quince años reclamando esta regulación y que participaron activamente na ellaboración del borrador xunto a otres asociaciones y a la Dirección Xeneral de Diversidá del Principáu. Pese a ello, Asturies sigue instalada nel vagar políticu. Una anomalía difícil d’entender nun territoriu que se presenta públicamente como progresista y comprometíu cola igualdá.

La conclusión pa los colectivos ye clara: resulta vergoñoso que, a estes altures, una parte importante de la población asturiana siga ensin una ferramienta llegal que defenda los sos drechos básicos. Les pallabres institucionales tán mui bien, pero ensin lleis efectives queden namás en pura propaganda.

This work is licensed under a Creative Commons Attribution 4.0 International License.