L’Academia de la Llingua Asturiana abrió la convocatoria de la Olimpiada Escolar de Redaición «Urbano Rodríguez», dirixida a escolinos d’asturianu y d’eonaviegu. La iniciativa inclúi dos concursos, ún pa Educación Primaria y otru pa Educación Secundaria y Bachilleratu.

La olimpiada va desendolcase en dos fases. La primer va celebrase en modalidá sincrónica a distancia dende los centros educativos el 25 de febreru de 2026, ente que la fase final va ser presencial nel llar de la Academia de la Llingua Asturiana el 25 de marzu.

El periodu d’inscripción va dende’l 12 de xineru hasta’l 12 de febreru. Cada profesor o profesora d’asturianu tendrá d’unviar una solicitú a la dirección de corréu electrónicu informacion@alladixital.org, acompañada d’un certificáu de la Secretaría del centru, el llistáu completu del alumnáu participante y la correspondiente autorización de cesión de datos. La Secretaría de la ALLA confirmará toles solicitúes pol mesmu mediu. Pa poder participar, los centros educativos han disponer d’espacios con cámara, pantalla y conexón a Internet.

La primer fase va celebrase el 25 de febreru a les 10 de la mañana. L’Academia comunicará per videoconferencia’l tema y les condiciones de la redaición nel momentu d’entamar la prueba. Tres una hora de trabayu, el profesoráu collaborador recoyerá les redaiciones y va disponer hasta’l 4 de marzu pa escoyer les obres finalistes, que tendrán d’unviase escaniaes en formatu PDF xunto cola documentación correspondiente. Nos centros con más de 50 persones matriculaes en llingua asturiana nun se podrá presentar más del 10 % d’esi censu, y nel restu de los centros el máximu va ser de cinco obres.

La llista de finalistes de Primaria y de Secundaria y Bachilleratu va asoleyase’l 13 de marzu. Xunto a ella, l’Academia va espublizar la convocatoria de la final, prevista pal 25 de marzu. Les persones finalistes tendrán d’acudir acompañaes pol profesoráu collaborador del so centru y van conocer les temátiques y condiciones de la redaición xusto enantes d’entamar la prueba.

El xuráu, que va evaluar la calidá de los testos y l’axuste a les normes, va repartir premios en cada categoría, que nun van poder quedar ermes. Estos premios van consistir en material escolar, llibros, un elementu conmemorativu y un val d’ayuda pal profesoráu, en función del desplazamientu y del númberu de finalistes. Amás, toles persones participantes van recibir un diploma acreditativu de la Olimpiada.

La documentación necesaria pa la inscripción y el desenvolvimientu del concursu va tar disponible dende’l 8 de xineru de 2026. Participar nesta convocatoria implica aceutar dafechu les bases, que podríen camudar por necesidaes organizatives, circunstancia de la que s’informaría al profesoráu collaborador.

Susana Sela

This work is licensed under a Creative Commons Attribution 4.0 International License.