La Sala Lata de Zinc d’Uviéu va volver ser l’escenariu del Semando Fest, que yá tien fecha pa la so cuarta edición. La cita va celebrase’l sábadu 7 de febreru de 2026 y va poner el focu, una vuelta más, na música moza creada n’asturianu, con una programación pensada pa desendlcase dende les ocho de la tarde hasta bien entrada la nueche

Nesta ocasión, el festival va xuntar sobre l’escenariu a Rellume, Entós, PVXARRA y la propuesta compartida de Fruela 757 y Lucía Rojo, que xira alredor de la tonada lletrónica. Trátase de proyectos bien distintos ente sí, tantu polos formatos como poles influencies, pero con un denominador común: l’usu de la llingua asturiana como ferramienta creativa y como elementu central del so discursu musical. La programación reflexa, asina, un percorríu que va dende reinterpretaciones venceyaes a la tradición hasta soníos y planteamientos claramente contemporáneos.

El Semando Fest consolidóse col tiempu como un espaciu d’alcuentru pa nueves voces de la escena musical del país. Dende les sos primeres ediciones, la iniciativa apostó por crear un marcu compartíu onde convivan proyectos que tán dando los sos primeros pasos con otros que yá tienen un percorríu reconocible, favoreciendo asina la visibilización y la continuidá de la música n’asturianu.

Les entraes pa esta cuarta edición yá tan disponibles na plataforma Entradium, onde puede consultase la información relativa a precios y aforu. Dende la organización insístese na conveniencia de mercales con antelación, teniendo en cuenta les dimensiones del recintu y la demanda prevista.

Con esta nueva entrega, el Semando Fest caltién el so llugar dientro del calendariu cultural asturianu y reafirma un formatu de festival de sala que pon especial atención nes xeneraciones más nueves d’intérpretes y creadores, contribuyendo a dar puxu a una escena musical que sigue medrando y diversificándose en llingua asturiana.

Susana Sela

This work is licensed under a Creative Commons Attribution 4.0 International License.