El desemplegu volvió a medrar n’Asturies en payares, algamando les 50.996 persones a la gueta d’emplegu, acordies los datos del SEPEPA y del Ministerio de Trabayuy Economía Social. Son 107 más que nel mes anterior, una variación pequeña pero que confirma una tendencia continuada a l’alza
Esti repunte supón el tercer mes consecutivu d’aumentu del paru, un movimientu que prende una señal d’alerta nuna coyuntura llaboral que demientres el branu paecía dir meyorando. Les cifres oficiales indiquen que tamién sigue habiendo menos desemplegaos qu’hai un añu, pero la evolución mes a mes pon de manifiestu un deterioru que nun puede desatendese.
Hai un factor que les estadístiques oficiales nun recueyen y que tien un pesu importante a la hora de valorar estes cifres: bona parte de la mocedá desemplegada nin siquier llega a inscribise como demandante d’emplegu al SEPEPA, por consideralo inútil o pocu eficaz; los fixos discontinuos que nun trabayen nesti momentu nun cuenten tampocu comu paraos.
Tres meses siguíos de xorrecimientu del desemplegu marquen un cambéu de tendencia destacáu que se xune a la perda xabaz de capacidá alquisitiva por parte de los que cobren un salariu y a la precariedá de los contratos esistentes.
Nel Dos Santos
This work is licensed under a Creative Commons Attribution 4.0 International License.
