Les polítiques de Trump y les especulaciones d’ArcelorMittal nel fondu de la cayía de cuasique un 6% de la producción industrial asturiana nel caberu mes
El mes d’ochobre traxo una baxada xeneralizada nos niveles de producción industrial n’Asturies, de la que namás escapen les actividaes d’alimentación, bebíes y gas, según les estadístiques de la Sociedad Asturiana de Estudios Económicos e Industriales (Sadei). El país rexistró n’ochobre una cayida interanual del 5,9 % na so actividá fabril, col que se rompe una serie de cinco meses consecutivos d’ascensu.
La parada d’instalaciones na ArcelorMittal, cola consiguiente activación d’un ERE, ye un de los factores que tán detrás d’esti descensu, anque nun ye l’únicu. N’ochobre entamó tamién a notase n’Asturies l’impactu de la cancelación de proyectos d’eólica marina nos Estaos Xuníos por causa de la política proteicionista de Donald Trump. Compañíes como Windar Renovables quedáronse ensin la actividá prevista, lo que se treslladó a regulaciones d’emplegu y a efeutos nel conxuntu de la cadena de valor del sector.
Los analistes de Sadei venceyen la parada del fornu altu con una cayida del 16 % na rama de la metalurxa y destaquen que la contracción más acusada en términos interanuales diose na fabricación de productos metálicos, con un descensu del 20,2 %, motiváu ente otros factores polos efeutos de les cancelaciones de contratos pa producir estructures d’enerxíes renovables. Esti retrocesu estendióse tamién a la industria tresformadora de los metales, que baxó un 5,8 %.
Xunto a esti conxuntu metálicu, otres actividaes manufactureres influyeron de manera notable nos resultaos del mes, cayendo un 14,9 % y los otros productos minerales non metálicos fixéronlo nun 13 %. Estes cayíes, sumaes al mal momentu del conglomeráu metálicu, llastraron el comportamientu del índiz xeneral de producción industrial n’Asturies.
Nel Dos Santos
This work is licensed under a Creative Commons Attribution 4.0 International License.
