El Concursu  Semeyes de LA SIDRA ñació hai 20 años col oxetivu de poner en valor el potencial artísticu y cultural de la sidre, dando continuidá al corpus visual que, a lo llargo de xeneraciones, quedare plasmáu n’abondes obres pictóriques asturianes.

La 17ª edición d’esti certame cellebró l’actu d’entrega de premios ayeri, 14 de payares, na Sidrería La Galana, collaboradora dende los entamos y sede añal de l’esposición de les obres premiaes y finalistes. Na ceremonia, guiada pol presidente de la Fundación Asturies XXI, Marcos Abel Fernández, participaron tamién Esther Freire, diputada na Xunta Xeneral, y Juan José Tomás, llagareru de Sidra JR y patrocinador principal del certame.

Organizáu pola Fundación Asturies XXI, col patrocinio del llagar Sidra JR y la collaboración artística y téunica de la Asociación Asemeyando, el certame volvió atraer una participación destacada, calteniendo cifres asemeyaes a les de la edición pasada: cerca de 300 semeyes procedentes d’una vintena de países. Un alcuerdu que confirma la so proyección global y el creciente prestíu nel ámbitu artísticu y fotográficu.

El xuráu tuvo presidíu pol fotógrafu asturianu Luis José Vigil-Escalera, ‘Lujó Semeyes’, Mayestru de la Confederación Española de Fotografía (MCEF) y Excelencia FIAP. La so esperiencia profesional y la so trayeutoria espositiva aportaron rigor a una edición marcá pola diversidá téunica y temática de les obres presentaes.

El Primer Premiu —dotáu con 700 euros y la Medaya d’Oru de la Confederación Española de Fotografía— foi pa’l fotógrafu rioxanu Eduardo San Vicente por “Gotes que cuenten histories: escanciando tradición”. La obra, fecho durante una visita al llagar Sidra Herminio, amuesa a la cuarta xeneración de la familia, Danka Rodríguez, echando un culín dende’l tonel.

El Segundu Premiu, con 200 euros y la Medaya de Plata de la CEF, recayó en Juan Carlos Hernández Fernández por “Siempre ta con nós”, una semeya tomada na Fiesta de la Sidra de Xixón.

El Tercer Premiu —100 euros y Medaya de Bronce de la CEF— foi otorgáu a Francisco J. Domínguez García por “Sidra cardiosaludable”, un minimalista xuegu visual nel que les botelles dibuxen, sobro un fondu verde, una llinia asemeyada a un electrocardiograma.

La Mención Especial “Sidra JR”, dotada con 100 euros y dos caxes de Sidra JR, foi pa Óscar Chamorro Flórez pola so obra “Llavaderu de botelles”, una imaxe en blanco y prietu centrada nel procesu de llimpieza y reutilización de les botelles nel llagar.

El concursu y les esposiciones venceyaes cuenten col sofitu del llagar Sidra JR y cola subvención de la Conseyería de Cultura, Política Llingüística y Deporte del Principáu d’Asturies, que sofita la promoción del padremuñu sidreru como espresión viva de la identidá asturiana.

Al tiempu de la entrega inauguróse la esposición coles 20 semeyes finalistes, que va permanecese na Sidrería La Galana tol mes enantes de treslladase al Muséu de la Sidra d’Asturies (Nava). A lo llargo de 2026, la muestra itinerante “Semeyes de LA SIDRA” va percorrer delles ciudaes europees integraes na rede Cider Cities.

Esta itinerancia internacional tien como oxetivu amosar la sidra como símbolu d’identidá compartida y como productu cultural con un fondu arraigu históricu, contribuyendo a la proyección d’Asturies como referencia europea nel ámbitu sidreru.

This work is licensed under a Creative Commons Attribution 4.0 International License.