El Palaciu del Marqués de Camposagrado va convertise los díes 17, 18 y 19 d’ochobre n’un espaciu dedicáu a la celebración del plurillingüismu y la interculturalidá.
Festillingües, el nuevu festival nacíu en Avilés, ñaz col envís de poner en valor la bayura de les llingües y afondar na so relación cola creación artística, la música y la identidá cultural.
Durante tres xornaes, el recintu va acoyer conferencies, meses reondes, talleres, conciertos y espectáculos al campu, amás d’un mercáu dedicáu a les llingües y cultures del mundu. El programa ta pensáu pa públicos de toles edaes y busca favorecer l’alderique y la participación ciudadana al rodiu de la diversidá llingüística.
El vienres 17 va dedicase principalmente al alderique. La programación va entamar con una charra sobre la intelixencia artificial y la preservación de les llingües minoritaries, a la que van siguir meses reondes sobre la tresmisión interxeneracional y la creación artística en llingües en riesgu. La música va tener tamién el so espaciu con una conferencia dedicada a la so importancia como vehículu de normalización llingüística.
Pela tardi, el públicu va poder visitar el Mercáu de les Llingües y les Cultures, participar en talleres y disfrutar d’intervenciones artístiques y d’un recital poéticu y musical nel que les llingües van entellazase sobre l’escenariu.
El sábadu 18 el festival va centrase nes esperiencies vivenciales. Un conciertu didácticu d’apertura va proponer un viaxe musical polos preseos del mundu, siguíu d’espectáculos d’improvisación y humor que van demostrar cómo la risa tamién ye una ferramienta de normalización.
La programación inclúi un taller de toponimia y una visita guiada pola contorna d’Avilés, pa reflexonar sobre la conexón ente les pallabres y los paisaxes.
La xornada va zarrar cola Folixa de les Llingües y les Cultures, un conciertu compartíu ente un grupu asturianu y una banda invitada d’otra comunidá llingüística, símbolo de la unión cultural que promueve’l festival.
El domingu 19 va tar dedicáu principalmente a les families, con cursinos exprés d’introducción a distintes llingües y cuentacuentos n’asturianu pa los más pequeños.
El festival va concluyir cola Espicha del Mundu, un zarru gastronómicu y musical que pretende celebrar lo compartíu mientres la fin de selmana y brindar poles cultures y llingües que conformen la diversidá del mundu.
El director del Festillingües, Inaciu Galán, destaca que “la diversidá llingüística ye una riqueza que tenemos de protexer, y Festillingües naz pa ser un llugar d’alcuentru, celebración y visibilidá, con Avilés como escenariu privilexáu”.
Susana Sela
This work is licensed under a Creative Commons Attribution 4.0 International License.
