L’eventu, que se cellebrará pente’l 25 ya’l 28 de setiembre, ufrirá 206 productos de 68 llagares vinientes de 18 países. Esti añu como novedá regalaráse un vale degustación cola entrada a Agropec
El XV Salón Internacional de les Sidres de Gala (SISGA) va cellebrase en Xixón ente’l 25 y el 28 de setiembre, consolidándose como l’eventu sidreru más importante d’Asturies y ún de los más relevantes d’Europa. La Casa Paquet, sede de Turismu del Conceyu, acoyó la presentación oficial d’esta nueva edición.
Abrió l’actu Daniel Martínez, direutor de Visita Xixón, quien destacó la sidre como “parte esencial de la forma de vivir y relacionanos n’Asturies, un emblema que queremos amosar al mundu”. Martínez calificó’l SISGA como turismu en estáu puru y un escaparate internacional que refuerza a Xixón como destín de referencia gastronómica, cultural y empresarial.
El segundu turnu foi pa Álvaro Ordás, en representación de la Cámara de Comerciu, que xunto col compromisu de la entidá anunció la novedá d’esta edición: la entrada pa Agropec inclúi un val pa una degustación de sidra nel SISGA.
Darréu intervieno Antonio Migoya, pola Fundación Caja Rural de Xixón, que resaltó’l llargu percorríu del Salón y asoció el SISGA al conceutu de “promoción inversa”: traer a Asturies a inversores, empreses y autoridaes de fuera pa que conozan lo que se fai equí y se conviertan en embaxadores non solo de la sidre, sinón de los productos gastronómicos y la cultura asturiana.
Tomó la pallabra depués Manuel M. Busto, presidente del xuráu internacional que nesta edición va valorar 207 productos procedentes de 68 llagares de 18 países. Busto destacó la contribución del SISGA al reconocimientu de la cultura sidrera como patrimoniu universal, recalcó la vocación de permanencia del certame y reclamó mayor atención de los medios de comunicación.
Preslló la ronda de intervenciones Marcos Abel Fernández Marqués, presidente de la Fundación Asturies XXI, quien recordó que “somos un país pequeñu a dos hores de Londres” y desplicó los oxetivos del SISGA: abrir nuevos espacios pal consumu de sidre fora del ámbitu tradicional, resaltar la so calidá y capacidá de maridaxe con productos gastronómicos d’alta gama, y potenciar la interconexón internacional ente territorios productores.
Destacó tamién los Premios SISGA, que con un sistema de xuráu formáu polos propios llagareros participantes, siguen afitándose como referencia internacional pola so credibilidá y ecuanimidá. Esti modelu de xuráu únicu nel mundu y el calter innovador del Salón tán contribuyendo a esparder el modelu fuera d’Asturies, como demuestra’l SISGA Japan celebráu n’abril en Tokio, que congregó a más de 4.000 persones.
La cita principal pal públicu xeneral va ser el sábadu 27 de setiembre nel Salón de Congresos de la FIDMA, con una xornada de tastia abierta en doble sesión (12 a 15 h. y 17 a 20 h.). Por diez euros, el públicu va poder degustar toles sidres presentaes y falar directamente colos productores de tol mundu. El programa va concluyir col Brunch de Gala nel Llagar Finca El Duque, escenariu de la entrega de los Premios SISGA.
This work is licensed under a Creative Commons Attribution 4.0 International License.
