El domingu 17 tendrá llugar el tradicional homenaxe cellebráu en Tarna por Andecha Astur a la Declaración de Soberanía proclamada pol Conseyu d’Asturies y Llión en 1937, “un acontecimientu que supunxo la independencia de factu y de drechu frente a la República Española”
El 24 d’agostu de 1937, va 88 años, los asturianos proclamaben el Conseyu Soberanu d’Asturies y Llión, independizándose a tolos efeutos de la República Española ya entamando un procesu hestóricu nel que’l presidente del Conseyu, Belarmino Tomás, llegó a solicitar a la Sociedá de Naciones el reconocimientu internacional d’Asturies como nación independiente y nel que se defendió heróicamente’l territoriu colos escasos medios disponibles frente a tres de los mayores exércitos d’Europa, l’exércitu franquista español y los sos alliaos alemanes ya italianos.
La República española nun vió bien esta autodefensa, qu’implicaba la perda de la so hexemonía territorial, llegando a pidir la rendición d’Asturies y a considerar un alliviu la violenta acupación poles tropes facistes.
L’actu sedrá abiertu y tendrá llugar el domingu 17 d’agostu nel Puertu Tarna; comu lleva faciéndose dende va cerca una década, l’homenaxe tendrá dos partes estremaes: a les 10:00 entamará la xubía a les trincheres de la Filispardi, tallaes na mesma roca pol exércitu asturianu, onde se llantará una asturina. A les 13:30 tendrá llugar l’homenaxe y ufrienda floral, delantre’l monumentu que fai alcordanza d’esta hestórica declaración, aniciu d’una auténtica República Asturiana.
L’homenaxe finará con una xinta popular na Fonte la Nalona.Andecha Astur considera qu’el Conseyu Soberanu foi la cabera istitución democráticamente escoyía polos asturianos, ya que, remembren, nun escoyimos la nuesa forma de gobiernu actual “na llamada ‘Transición’ que siguió al franquismu impúnxosemos dende Madrid, ensin consultes al pueblu asturianu, la fórmula d’un “Principado” y un Estatutu autonómicu hestórica y socialmente ayenu, qu’ensiquiera nun reconoz principios democráticos tan básicos como la oficialidá de la nuesa llingua nacional, y que perpetúa una situación de colonialismu inaceutable.”
Nel Dos Santos
This work is licensed under a Creative Commons Attribution 4.0 International License.
