El Coleutivu Ecoloxista d’Avilés denunció énte la Conseyería d’Infraestructures d’Asturies y la Confederación Hidrográfica un nuevu arramáu de productos oleaxinosos producíu na ría d’Avilés, que s’apreciaba ayeri al atapecer nel colector al altor de la nave laminación d’Arcelor, como pudieron comprobar les persones que transitaben pol paséu de la ría
Esti arramáu súmase a la llista interminable d’episodios contaminantes qu’acaben na ría d’Avilés y los sos afluentes, magar la repitida promesa de tomar midíes pa evitales per parte de les autoridaes.
Los arramaos industriales -que son avezaos nesti calce- son un grave problema ambiental, qu’incumple tola normativa vixente europea, que tien por oxetu la recoyida y tratamientu de les agües residuales, cola fin de protexer al mediu ambiente de los efeutos negativos de los arramaos d’estes agües. Los ecoloxistes entienden qu’estos fechos suponen un claru delitu d’alcuerdu a la Llei Orgánica 10/1995 per parte de los autores, al producise una contaminación continua por neglixencia, suponiendo un dañu grave pal equilibriu de los sistemes naturales.
Denuncien tamién la ineficiencia del coleutor industrial istaláu na vera drecha la ría, yá que “arrama al emisariu ensin depurar parte de los residuos, que nun se ven y van a la mar direutamente, contaminando tola zona d’arramáu del emisariu y la mariña colindante que, poles corrientes dominantes, va ser la de Gozón. L’emisariu nun depura nada, solo impulsa más llueñe los llíquidos”.
This work is licensed under a Creative Commons Attribution 4.0 International License.
