La saturación d’un barriu perpobláu y con una media d’edá mui alta, comu ye’l casu de Contrueces, súmase al fechu de que los alrodiu de 5.000 vecinos de Nuevu Roces continuen a la espera de que s’abra el prometíu consultoriu nel so barriu. Entantu y non, desixen que se reforcie una plantiya nidiamente insuficiente pa les necesidaes de los dos barrios

N.O.B., vecina de Nuevu Rocés, acudió al cientru de salú de Contrueces -que ye’l que correspuende a los vecinos d’esa zona- por una lumbalxa. Dieron-y cita pa dientro diez díes. Nun ye la única: T.V.P,  tuvo d’esperar 20 díes pa ser atendía. La situación agrávase’n pediatría, la falta de facultativos torga la correcha atención y davezu recaen sobre la familia decisiones sobre la melecación de la reciella, comu ye’l casu de C.B.L, que depués de tener al neñu ingresáu nun tien forma de llevalu a les revisiones.

Esta situación, denuncien los vecinos, lleva asina más d’un añu.”Col serviciu públicu tan precariu que tenemos, nin ye atención primaria nin ye nada” llamentaba N.O.B., que veía comu tendría qu’escoyer pente aguantar los dolores, automelicase, pagar un mélicu priváu o acudir a urxencies. Esta cabera opción, ye la más avezada, xenerando maltar pente los propios pacientes, que coscientes del problema de saturación de les urxencies “nun quieren facer mal usu de la sanidá pública”, pero que nun tienen otra opción.

Llucía F. Marqués

This work is licensed under a Creative Commons Attribution 4.0 International License.