El Festival Intercélticu d’An Oriant (Lorient)  vivió güei ún de los sos momentos más esperaos cola celebración del Gran Desfile de les Naciones Celtes, un espectáculu qu’en cada edición convierte les cais de la ciudá bretona nun escaparate de la riqueza cultural de los pueblos celtes. Decenes de miles de persones siguieron el percorríu d’un desfile nel que participaron representantes de les nueve naciones celtes, ente elles Asturies.

Nesta 54.ª edición del festival, consideráu’l mayor alcuentru internacional dedicáu a les cultures celtes, más de 3.000 músicos, bailladores y grupos folclóricos percorrieron les cais d’An Oriant ante un públicu internacional que superó les 70.000 persones. El soníu de les gaites, los tambores y la música tradicional acompañó un desfile cargáu de color, tradición y emoción.

La nación convidada d’honor d’esti añu foi Galicia, que participó con una amplia representación formada pol Grupu de Música de Silleda, la Banda de Gaites de Forcarei, la Banda de Gaites Invernia y el Grupu de Baile Xacarandaina.

La delegación asturiana volvió demostrar la fuercia de les sos tradiciones y la importancia que tien Asturies dientro del mundu celta. La participación asturiana tuvo encabezada pola Banda de Gaites La Reina del Truébanu (Navia) que foi una de les agrupaciones que mayor entusiasmu espertó ente’l públicu.

Amás desfiló’l Grupu de Baile Tradicional San Félix de Candás que desfilaron con arguyu col traxe asturianu, representando la identidá y la cultura del país.

El Gran Desfile volvió ser unu de los actos más multitudinarios del Festival Intercélticu d’An Oriant, convirtiendo les cais de la ciudá nun auténticu mosaicu de cultures, soníos y colores. Bandes de gaites, grupos de música tradicional y formaciones de baille ofrecieron una imaxe de convivencia y hermanamientu ente los pueblos celtes, nun ambiente festivo que foi siguíu por miles de visitantes procedentes de distintos países.

Con una participación cada vez más consolidada, Asturies reafita un añu más el so papel dientro del Festival Intercélticu d’An Oriant.

Esta obra está licenciada bajo una Licencia Creative Commons Atribución 4.0 Internacional.