El conceyu de Colunga va acoyer esta selmana dos nueves propuestes culturales incluyíes nel programa Asturies, Cultura en Rede, dientro de la iniciativa municipal “N’abril… lletres mil”, entamada pola área de Cultura en collaboración coles biblioteques y los sos clus de llectura.

La primera cita va tener llugar el xueves 16 d’abril, a les 17:30 hores, nel Centru Municipal “El Piqueru” de Llastres. Trátase d’una llectura dramatizada basada na obra Atlas de geografía humana, que combina elementos de la llectura escénica cola representación teatral.

La propuesta articúlase alredor d’un atlas, que sirve como filu conductor pa dar forma a los recuerdos, pensamientos y vivencies de les protagonistes. Dos intérpretes encárguense de dar vida a tolos personaxes, alternando voces, ritmos y rexistros nun montaxe que reflexona sobre la identidá, el pasu del tiempu y les rellaciones personales.

La programación va continuar el vienres 17 d’abril, a les 19:00 hores, na Sala Loreto de Colunga, col espectáculu “Ser quien a cantar”. Esta propuesta combina poesía, música y imaxe pa construir un percorríu pola trayeutoria de muyeres asturianes con presencia na vida pública.

Al traviés de distintos recursos escénicos, el montaxe pon el focu en ámbitos como l’activismu, la cultura o la política, y propón una reflexón sobre la construcción de la identidá y la importancia d’espresar la voz propia.

Dambes actividaes formen parte d’una programación que busca averar la cultura contemporánea al territoriu, fomentar la participación vecinal y reforzar el papel de la cultura como ferramienta de dinamización social nel conceyu