Iniciativa pol Asturianu abrió esti xueves el procesu de matrícula d’una nueva edición de cursos d’asturianu. La formación va desendolcase a distancia, al traviés d’una plataforma dixital, dende’l 29 d’abril hasta’l 10 de xunetu d’esti añu 2026, con una duración de 11 selmanes, lo que supón un total de 50 hores llectives.

La formación va estructurase del siguiente mou: 25 hores de tutoríes a distancia —de carácter obligatoriu—, otres 20 hores de trabayu autónomu y 5 hores complementaries con actividaes propuestes pol tutor o la tutora. Al final del cursu va realizase una prueba. Esti tipu de modalidá a distancia favorez la autoorganización del alumnáu y permite-y avanzar nes actividaes de la manera más conveniente.

Esti nivel inicial ta empobináu a persones ensin formación previa en llingua asturiana o con un nivel baxu de conocencia. Les persones que superen la formación íntegra van algamar una acreditación de la Academia de la Llingua Asturiana que certifica un nivel A1 d’asturianu.

El preciu de la matrícula ye de 75 euros. Les persones asociaes a Iniciativa pol Asturianu van beneficiase d’un descuentu y namái tendrán qu’abonar 60 euros. Amás, les persones interesaes pueden asociase nel momentu de la matrícula y disfrutar d’esti descuentu.

Les inscripciones pueden formalizase al traviés d’un formulariu disponible na páxina web d’Iniciativa pol Asturianu, onde tamién s’alcuentren toles condiciones del cursu, dende esti xueves 9 d’abril hasta’l día 23 d’esti mes.

This work is licensed under a Creative Commons Attribution 4.0 International License.