Resulta llamativu’l eleváu númberu de parques de bateríes que ta tramitando y autorizando’l Gobiernu asturianu en rellación col consumu eléctricu del país presente y futuru, mui lloñe del compromisu de llindar la capacidá d’almacenamientu a 300 MW.
El Colectivu Ecoloxista d’Avilés denuncia la espublización nel BOPA de la autorización y tramitación de tres parques de bateríes n’Avilés, nuna sorprendente espiral d’autorizaciones enerxétiques.
En concretu, ún d’ellos ye’l denomináu BESS Maruca, asitiáu na avenida Conde Guadalhorce, en suelu industrial, con 24 contenedores y 45 MW de capacidá, coneutáu por aciu d’una llinia de 786 metros cola subestación de La Maruca, yá autorizáu. Tamién figura’l parque de bateríes Tabiella H-BESS, en Maqua, en suelu industrial compartíu con Gozón, con 6 contenedores y 9 MW de capacidá, coneutáu con una llinia de 4.596 metros a la subestación de Tabiella, igualmente autorizáu. Amás, inclúyese’l proyeutu FIB002, en Valliniello, nel suelu industrial del polígonu, con 48 contenedores y 56,8 MW de capacidá, coneutáu con una llinia de 2.190 metros a la subestación de Tabiella, qu’anguaño se atopa en tramitación ambiental.
Los datos recoyíos hasta agora evidencien que la esposición escesiva a campos electromagnéticos aumenta’l riesgu de lleucemia n’adultos, cáncanu de mama o cerebral, y afeuta per igual a homes y muyeres.
Los riesgos que suponen esti tipu d’instalaciones en casu de fuga térmica o d’incendiu implicaríen consecuencies irreversibles de gran gravedad pa los colindantes, tanto pal mediu ambiente como pa la salú humana, polo que se considera inadmisible la so instalación cerca de núcleos de población, llugares d’interés ambiental o zones protexíes.
Amás, dalgunes de les sustancies emitíes en casu d’incendiu son irritantes, corrosives y tóxiques. Pa garantizar la protección de la salú humana, de la vexetación y del mediu ambiente, ye imprescindible disponer de medios específicos pa la estinción del fueu. Delles fontes indiquen que l’usu d’espumes, CO₂ y otros axentes estintores podría nun ser efeutivu nel combate del fueu d’una batería d’ión litiu, siendo l’agua’l métodu más eficaz; sicasí, esto implicaría la contaminación de grandes volúmenes d’agua col consiguiente riesgu ambiental.
Los parques de bateríes que, de momentu, se propunxeron na contorna son de distintos tamaños, y na actualidá conózense 16 proyeutos: cinco n’Avilés, ocho en Gozón y trés en Corvera.
This work is licensed under a Creative Commons Attribution 4.0 International License.
