La declaración del horru, la panera y el cabazu como Manifestación Representativa del Padremuñu Cultural Inmaterial por parte del Ministeriu de Cultura llegó esta selmana como un titular de celebración institucional. Un reconocimientu simbólicu que, según el Gobiernu, “blinda” la identidá rural asturiana. Pero baxo esi discursu oficial escuéndese una paradoxa incómoda: mentanto se proclama la importancia cultural del horru, el cabazu y la panera, estes construcciones sigan esbarrumbando a diario ensin control nin responsabilidaes.
Horru nel Conceyu Castrillón
N’Asturies calcúlase que sobreviven alredor de 30.000 hórreos, munchos d’ellos en mal estáu o directamente abandonaos. Nun hai, sicasí, un rexistru públicu, completu y actualizáu d’horros, paneres y cabazos. La propia normativa reconoz que los censos históricos son incompletos y poco fiables. Ye dicir: nun se sabe con precisión qué hai, nin onde ta, nin en qué estáu se atopa.
Esti vacíu contrasta cola esistencia d’un marcu llegal vixente dende hai más de venticinco años. La Llei 1/2001 de Padremuñu Cultural del Principáu d’Asturies obliga claramente a los propietarios a caltener y conservar los bienes patrimoniales. Sobre’l papel, l’horru ta protexíu. Na práctica, la falta de control y d’aplicación efectiva de la llei conviértelu nun padremuñu ensin defensa real.
Los datos que manexen colectivos ciudadanos evidencien esa desconexón ente norma y realidá. Plataformes como horruonline.com vienen denunciando dende hai años la situación: 515 denuncies presentaes por horros en peligru o en procesu de derrumbe, 22 d’elles namái nel mes de marzu. Casos documentaos, con llocalización concreta y avisos reiteraos, que nun atoparon respuesta alministrativa.
Falamos, amás, de construcciones con sieglos d’historia. Dellos horros que se tán perdiendo superen los 300 o 500 años d’antigüedá, auténtiques pieces de la arquitectura popular que desapaecen ensin nengún tipu d’intervención pública. Cada esbarrumbe nun ye solo una perda material: ye la desaparición d’una parte del paisaxe, de la memoria colectiva y de los saberes tradicionales que la propia declaración institucional diz querer protexer.
En más de dos décades de vixencia de la llei, nun se promovió una política sistemática de declaraciones como Bien d’Interés Cultural pa estos elementos; de fechu, nin un solu recibió el reconocimientu de BIC. Agora, ensin esi trabayu previu de catalogación, inventariu y protección efectiva, l’Alministración súbese al carru del reconocimientu simbólicu estatal, previsiblemente ensin más enfotu qu’enllenar titulares.
Porque lo anunciao esta selmana nun ye, en rigor, una midida de conservación directa. Trátase d’una declaración de calter inmaterial que pon el focu na dimensión cultural y social del horru, non na so preservación física . Una diferencia clave: reconózse’l valor, pero nun s’articulen mecanismos nuevos nin concretos pa evitar que sigan cayendo.
Entantu, la realidá inevitable ye que, cada día que pasa, n’Asturies hai menos horros.
This work is licensed under a Creative Commons Attribution 4.0 International License.
