Inaciu Galán representa a la lliteratura asturiana nel IV Encuentro de Poetas Iberoamericanos en Méxicu
Ente los díes 1 y 6 d’abril, la llocalidá mexicana de Teziutlán, en Puebla, recibe al escritor Inaciu Galán, convidáu a participar nel IV Encuentro de Poetas Iberoamericanos en Méxicu.
A lo llargo de la estancia, l’escritor va participar en dellos recitales y otros actos xunto a autores de países llatinoamericanos, incluyendo poetes en llingües orixinaries de Méxicu, nel marcu de la Feria del Libro de Teziutlán (Puebla).
Tán programaes dos conferencies d’Inaciu Galán: una centrada na hestoria y la situación actual de la llingua asturiana y la so lliteratura, y otra dedicada a la esperiencia de la Residencia Lliteraria Xixón, que l’autor fundó en 2023 y dirixe dende entós. Per ella pasaron escritores europeos y americanos, ente los que s’atopen nomes como David Uclés o Marisa Martínez Pérsico.
Xunto al poeta asturianu ta prevista la presencia d’autores como Sergio Briceño (Costa Rica), Jaime Ignacio Magnan Alabarce (Chile), Askari Martre, Angel Herrera, Yao Tonalli, Benito Benazi, Daniela Rico Straffon, Lina García, Eduardo Serdio, Jorge Contreras Herrera, Misael Martínez, Adriana P Velázquez, María Merced Nájera Migoni y Martín Tonalmeyotl (Méxicu).
Inaciu Galán (Xixón, Asturies, 1986) ye periodista, documentalista, profesor, xestor cultural y activista llingüísticu, amás de miembru de númberu de l’Academia de la Llingua Asturiana.
Como escritor en llingua asturiana, tien una quincena de llibros espublizaos y numberosos premios, ente los que s’atopen dalgunos de los de mayor prestixu pa obres n’asturianu. Foi traducíu a delles llingües y participa davezu en eventos internacionales en representación de la llingua asturiana.
Ente los sos proyectos lliterarios más destacaos tán la fundación de la revista Formientu, dedicada a nuevos autores n’asturianu y con yá venti años d’actividá, y la Residencia Lliteraria Xixón, onde trabaya nel intercambiu cultural ente llingües y lliteratures.
This work is licensed under a Creative Commons Attribution 4.0 International License.
