El Tribunal Superior de Xusticia d’Asturies desestima’l recursu d’EMC y confirma la decisión municipal de nun modificar el PGOU pa permitir la mina.
El Tribunal Superior de Xusticia d’Asturies (TSXA) desestimó íntegramente’l recursu presentáu pola empresa Exploraciones Mineras del Cantábrico (EMC) contra la decisión del Conceyu de Tapia de Casariego de nun modificar el Plan Xeneral d’Ordenación Urbana (PGOU) pa facilitar la esplotación minera en Salave.
La sentencia, con fecha 19 de marzu, avala l’alcuerdu adoptáu pol plenu municipal en payares de 2024, cuando se refugó l’aprobación inicial d’una modificación puntual del planeamientu urbanísticu. Con ella, la empresa pretendía reclasificar suelos de protección especial como Suelu d’Interés Mineru.
El fallu considera que’l Conceyu actuó conforme a derechu y sorraya que nun esiste una “obligación ineludible” de modificar el planeamientu a pidimientu d’una empresa privada. Nesti sentíu, el tribunal recuerda que la potestá de planeamientu ye una facultá discrecional de l’Alministración pa velar pol interés xeneral.
Amás, la resolución respalda los informes técnicos municipales, que conclúin que los terrenos de Salave caltienen los mesmos valores naturales, paisaxísticos y agrarios que motivaron la so protección nel PGOU. Según la sentencia, nun esiste “ninguna novedá física nin xurídica” que xustifique la so reclasificación.
El TSXA tamién apunta a la normativa autonómica, en concreto al Plan d’Ordenación del Llitoral Asturianu (POLA), que prohíbe de manera xeneral les actividaes estractives en suelu non urbanizable de mariña, lo que refuerza la incompatibilidá del proyectu col marcu llegal vixente.
Amás, el tribunal recuerda que’l Principáu d’Asturies yá declarara en febreru de 2025 la finalización del procedimientu d’evaluación d’impautu ambiental, al considerar inviable l’actuación dende un principiu pola so falta d’encaxe urbanísticu.
Tres conocese la sentencia, la Plataforma Oro Non, que participó como codemandada nel procesu, valoró’l fallu como un respaldarazu a la postura caltenida nos últimos años frente al proyectu mineru de Salave.
This work is licensed under a Creative Commons Attribution 4.0 International License.
