La banda asturiana Skama La Rede cellebró en Kuivi Almacenes la so Folixa 20 años, un conciertu especial col que festexó más de dos décades enriba de los escenarios y presentó’l so nuevu trabayu discográficu, que lleva’l mesmu nome
L’eventu, que colgó’l cartel de “entrades escosaes” una selmana antes, reunió a unes 500 persones nuna nueche pensada como una celebración colectiva. El conciertu, d’alredor de dos hores de duración, sirvió pa repasar toles etapes del grupu al traviés d’un repertoriu que percorrió la so trayeutoria musical dende los entamos hasta la actualidá.
La cita tuvo un calter únicu pola participación de más d’una decena de collacios d’otres bandes asturianes y d’ámbitu estatal, que compartieron escenariu col grupu nun formatu irrepetible. Ente los nomes destacaos tuvieron presentes artistes como Juankar Cabano, de Boikot, y Gabri Reigosa, de Dakidarría, amás de músicos bien conocíos de la escena asturiana como Xune Elipe (Dixebra), Daviz Rodríguez (Mala Reputación), Raquel (Ochobre), Pirri (Escuela de Odio), Humber (Misiva), Delfo (La Tarrancha) o Berto (Skontra).
A ellos sumáronse otros músicos como Xuan Rodríguez (Llan de Cubel y Matazúa), Natalia Menéndez (Ochobre), Daniel Álvarez (Corquiéu), Pastrana (Skontra) y la gaitera candasina Aida Sánchez, configurando una folixa musical colectiva que convirtió la nueche nuna celebración de la escena asturiana.
El DJ Avante’l Pueblu foi l’encargáu d’abrir y pesllar la xornada, poniendo’l ritmu d’una nueche que foi más allá de lo musical. El conciertu tuvo tamién un componente reivindicativu, cola presencia de les 6 de la Suiza y de la Xunta Pola Defensa la Llingua, que fixeron del eventu un espaciu de compromisu social y cultural.
Según anunció la organización, la actuación foi grabada en videu y n’audiu, col envís d’asoleyar parte del material nos próximos meses.
La Folixa 20 años confirmó asina la capacidá de convocatoria de Skama La Rede y el so papel como una de les bandes de referencia del ska-punk asturianu, nuna nueche que combinó música, celebración y reivindicación.
This work is licensed under a Creative Commons Attribution 4.0 International License.
