Estudiantes que puen matriculase llegalmente nos ciclos formativos nun puen completar la so formación por nun disponer de NIE, un requisitu imprescindible pa dase d’alta mientres la estancia en empresa y facer les práctiques

Un de ca 6 estudiantes n’Asturies son migrantes

L’escolináu migrante matriculáu en ciclos de Formación Profesional n’Asturies ta topando una nueva torga pa completar los sos estudios: la imposibilidá de facer les práctiques obligatories n’empreses. La normativa estatal obliga dende xineru de 2024 a que tean daos d’alta nel Réxime Xeneral de la Seguridá Social mientres el periodu de formación na empresa, una esixencia que dexa fuera a estudiantes que nun disponen de NIE.

La situación crea una contradicción evidente: esti colectivu pue matriculase nos ciclos formativos presentando’l pasaporte, pero depués nun puede realizar les práctiques obligatories que-y permitiríen completar la formación y algamar el títulu.

El problema yá ta detectándose en dellos centros asturianos. El profesoráu alerta de casos nos que dos familiares que cursen el mesmu ciclu atópense con realidaes bien distintes por cuenta de la so situación alministrativa. “Dase’l casu de familiares directos que tán estudiando lo mesmo: ún va poder incorporase a la empresa porque la so situación alministrativa ta más avanzada, pero l’otru nun va poder”, esplica una docente.

Esta situación súmase a otres llagunes detectaes tres la implantación del nuevu sistema de Formación Profesional, qu’aumenta la presencia de la formación en empresa. El profesoráu señala, por exemplu, que los estudiantes de la modalidá semipresencial —pensada precisamente pa persones adultes que trabayen— nun ta atopando medios reales que-y permitan compatibilizar l’emplegu coles estancies formatives.

Esti casu ye, pa munchos centros, un exemplu más de les dificultaes que ta xenerando’l nuevu modelu. El profesoráu denuncia improvisación y falta de rempuestes per parte de l’Alministración educativa, lo que ta provocando una xorreciente sobrecarga de trabayu. Ente los problemes señalaos tán la falta d’instrucciones clares, les deficiences de la plataforma informática de xestión, les dificultaes p’atopar empreses abondes pa les práctiques, l’ausencia de figures de prospección que la propia llei contempla, l’aumentu de la burocracia nos centros y la falta de formación específica y sofitu institucional.

Too ello asocede, amás, nun contestu de creciente privatización del sector. Ente que la demanda de Formación Profesional supera yá’l millón d’estudiantes nel Estáu, el crecimientu de la ufierta ta siendo absorbíu en gran midida por centros privaos, que multiplicaron la so presencia na última década, especialmente na modalidá online.

Dende los centros educativos reclámase a la Conseyería d’Educación una rempuesta inmediata énte esta situación. El profesoráu pide que se clarifique la normativa y que se garantice que nengún estudiante quede escluyíu de la so formación por mor d’obstáculos alministrativos.