«Onde enantes había un solar industrial enllenáu d’escombros agora hai un paseu pa disfrute de tola ciudadanía», señala Carmen Moriyón sobre’l proyectu Naval Azul.

«Onde enantes había puestos de trabayu agora hai un paseu y la menacia d’una fábrica d’armes», respuenden dende Andecha Astur.

Nun va tantu que Naval yera sinónimu d’actividá naval y llucha obrera

El contraste ente los discursos institucionales grandilocuentes y los planes reales vuelve asitiar nel centru l’alderique’l proyectu Naval Azul, tres la publicación a información pública del trámite ambiental del so plan especial. Esti pasu alministrativu marca l’entamu formal de la tramitación que tendrá d’afitar el futuru de los antiguos terrenes de Naval Xixón, unu de los espacios industriales más emblemáticos de la ciudá.

Pal gobiernu municipal, el proyectu representa una oportunidá estratéxica. La alcaldesa de Xixón, Carmen Moriyón, defende que Naval Azul ta «llamáu a marcar el futuru d’esta ciudá». Dende l’Ayuntamientu sorráyase la tresformación urbanística del área y la so recuperación pal usu ciudadanu. «Onde enantes había un solar industrial enllenáu d’escombros agora hai un paseu pa disfrute de tola ciudadanía», señala Moriyón, poniendo l’accentu na rexeneración d’un espaciu degradáu tres el zarru del históricu astilleru.

Sicasí, esa visión optimista nun ye compartida por tolos sectores. Dende Andecha Astur cuestionen el relatu institucional sobre la reconversión del ámbitu naval. «Onde enantes había puestos de trabayu agora hai un paseu y l’amenaza d’una fábrica d’armes», critiquen dende la organización, que considera que’l proyectu nun compensa la perda d’actividá industrial y d’empléu venceyáu al preslle del astilleru.

Pero, sobremanera, critiquen que se quiera vender un futuru llimpiu mientres, a espaldas de los vecinos, se negocia la posible implantación nel área d’una fábrica d’armamentu venceyada a Indra, señalada polos críticos como la principal iniciativa empresarial plantegada hasta’l momentu. Pa quien cuestionen el proyectu, l’apuesta por una industria militar difícilmente encaxa col relatu d’innovación y sostenibilidá que s’asocia a la llamada economía azul, ensin escaecer, apunten, al fechu de qu’esa fábrica asitiaría a Xixón como oxetivu bélicu de primer orde.

This work is licensed under a Creative Commons Attribution 4.0 International License.