Xuráu d’una edición anterior de la MPSLA
Queden poco más de quince díes pa la celebración de la gran espicha de Selmana Santa, un eventu que l’añu pasáu estrenó allugamientu nel Recintu Ferial Luis Adaro y que consiguió axuntar a más de 10.000 asistentes
Como pasu previu a esta nueva edición, esti fin de selmana entama la primer fase del concursu nel que s’escueye la Meyor Primer Sidre l’Añu. Na edición pasada, el reconocimientu foi pa Prado y Pedregal, del sierense Llagar La Morena.
La primer fase del Concursu a la Meyor Primer Sidre l’Añu 2026 va celebrase esti sábadu 21 de marzu, a les 12:00 hores, na Sidrería La Montera Picona de Ramón, en Xixón. Esta semifinal consistirá nuna cata a ciegues abierta al públicu na qu’un xuráu de profesionales y sumillers escoyerá les cinco sidres meyor valoraes ente toles presentaes.
Les sidres finalistes pasarán a la fase decisiva, que se celebrará’l miércoles 25 de marzu a les 18:00 hores nel mesmu establecimientu. Nesa sesión anunciaráse la sidre ganadora, que pasará a convertise na sidre oficial de la XVI edición de Primer Sidre l’Añu, prevista ente’l 2 y el 5 d’abril.
Amás, una vegada conocida la sidre vencedora, les persones asistentes podrán probar les sidres presentaes col oxetivu de conoceles y valorales directamente.
Como marca la tradición, adquiriránse 1.000 euros en sidre del llagar ganador pa que pueda ser degustada polos asistentes a la gran espicha de la Primer Sidre l’Añu, considerada una de les mayores celebraciones sidreres del país y el puntu d’arranque de la temporada, una cita ineludible pa cualquiera que se diga sidreru/a.
This work is licensed under a Creative Commons Attribution 4.0 International License.
