El gobiernu d’Asturies amuesa’l so temor polos pelligros de los parques de bateríes al tiempu que continúa aprebando proyectos d’elles per toa Asturies. Remembremos qu’hai 86 previstos afeutando a 25 conceyos

El Gobiernu del Principáu d’Asturies ta incrementando les midíes preventives y paliatives frente a posibles incendios nes instalaciones de bateríes, pero sigue autorizando estos proyectos cerca de viviendes y explotaciones agroganaderes calteniendo una evaluación ambiental simplificada. Esta situación plantega una contradicción evidente: si les bateríes son segures, ¿por qué cada vez se reclamen más midíes contra incendios? Y si nun lo son, ¿por qué se siguen autorizando?

El cambéu nel enfoque del Principáu pue vese claramente al comparar distintos informes d’impactu ambiental. Nel primeru emitíu sobre un proyectu d’esti tipu, el de Granda (Siero), fecháu’l 9 d’abril de 2024, les midíes contra incendios despachábense en malpenes ocho llinies. L’informe llendábase a pedir que se tuvieren en cuenta les midíes preventives incluyíes nel documentu ambiental —redactáu pola propia empresa promotora— y la normativa vixente, amás de considerar “conveniente” que la instalación cuntara con un plan d’autoproteición.

Sicasí, los informes más recientes amuesen un cambéu notable. Nel correspondiente al proyectu BESS Trasona, en Corvera, emitíu en xineru de 2026, les esixencies son muncho más amplies y detallaes. L’informe fala de la “vulnerabilidá del proyectu” —un eufemismu que sustitúi a la referencia directa a riesgos d’incendiu o esplosión— y afita una batería de midíes destinaes a amenorgar los riesgos y les sos posibles consecuencies.

Ente elles figuren hidrantes que garanticen caudal y presión d’agua durante al menos una hora, tomes d’agua accesibles pa los bomberos, viales capaces de soportar vehículos de 40 tonelaes pa facilitar l’accesu de los camiones d’estinción, sistemes de detección temprana de gases, fumu y temperatura, mecanismos automáticos pa desconectar el sistema en casu d’incidencia, sistemes d’estinción d’incendios, controles remotos con supervisión permanente y midíes pa evitar esplosiones por sobrepresión.

Amás, el Principáu entama a desixir muros cortafueu pa sectorizar les instalaciones, sistemes fixos d’aspersión o rociadores pa refrixerar el contornu d’un contenedor en casu d’incidente, y mayores distancies ente los contenedores de bateríes y les viviendes del entornu. L’informe tamién reclama que se caltengan distancies suficientes con otres instalaciones colindantes pa evitar la propagación del fueu.

Nel casu de zones forestales próximes, el documentu obliga a retranquear la instalación o crear una faxa de proteición d’al menos 30 metros d’anchor llibre de material inflamable, amás d’equipar la planta con medios específicos pa una respuesta rápida en casu d’incidente.

Esti endurecimientu de les midíes contra incendios evidencia el xorreciente esmolecimientu del Gobiernu asturianu pol riesgu d’un posible fueu nun sistema d’estos. Sicasí, el Principáu sigue defendiendo que los proyectos de bateríes nun tienen efectos significativos sobre’l mediu ambiente y que, poro, solo tienen que sometese a una evaluación ambiental simplificada, en llugar d’una evaluación ordinaria más desixente.

La contradicción resulta evidente. Si se considera necesariu imponer cada vez más midíes pa prevenir incendios y amenorgar los sos efectos, ¿cómo pue sostenerse al mesmu tiempu que estos proyectos nun tienen un impactu ambiental relevante?

La cuestión cobra especial importancia cuando estes instalaciones s’alluguen cerca de viviendes, centros de trabayu o esplotaciones agroganaderes. Un posible incendiu podría afectar non solo al mediu ambiente, sinón tamién a la salú pública y al bientar de les persones y los animales.

Ante esta situación, surde una entruga: ¿por qué nun se somete a evaluación ambiental ordinaria a tolos proyectos de bateríes que s’asitien cerca de zones habitaes? Esti procedimientu permitiría analizar con más detalle la so viabilidá y los riesgos reales antes de la so autorización.

Mentanto, el conseyeru d’Ordenación del Territoriu, Ovidio Zapico, anunció’l 10 de marzu que’l Gobiernu del Principáu sacará a información pública n’abril el documentu d’avance de les directrices pa regular la instalación de contenedores de bateríes n’Asturies. Queda por ver si esti documentu establecerá distancies de seguridá clares ente bateríes, viviendes y explotaciones agroganaderes, tal como recomienden los propios informes ambientales y la CUOTA.