El Teatru Filarmónica d’Uviéu acoyó’l 13 de marzu la gala d’entrega de los Premios AMAS 2026, una cita que col pasu de los años se consolidó como una referencia nel calendariu cultural de la ciudá y de la música asturiana. La velada volvió reconocer el trabayu d’artistes, bandes y profesionales del sector, nuna edición marcada especialmente pola presencia y el protagonismu de les muyeres na música asturiana.
La música n’Asturies volvió vestise de gala cola celebración d’una nueva edición de los Premios AMAS, los galardones que cada añu reconoz el trabayu de músicos, bandes y profesionales que formen parte del actual panorama musical del país. La gala, celebrada n’Uviéu, sirvió pa celebrar más de dos décades d’estos premios y pa poner en valor la vitalidá d’una escena musical cada vegada más diversa y activa.
Nesta edición entregáronse más d’una ventena de galardones, qu’algamen distintos estilos y oficios de la música, dende’l rock o’l folk hasta la electrónica o la producción musical.
Ente los discos destacaos del añu figuró “Secretos de contar”, de Rubén Alba, que consiguió’l premiu al meyor discu folk, mientres que’l galardón al meyor discu rock foi pa “Segundo aliento”, del grupu Onza, dos trabayos que representen bien la diversidá estilística de la escena musical asturiana actual. Na categoría de Canción de Música Urbana, el premiu foi pa “Paul & Cía.”, un tema firmáu por Pablo Diablo xunto a Sly N, Stxners Music, J. Cheff y Dossantos. La pieza destaca pola so naturaleza claramente colLaborativa, un rasgu avezau na escena urbana actual, onde la suma de voces, estilos y productores da como resultáu propuestes más diverses y dinámiques.
La gala tamién incluyó actuaciones en direutu y momentos dedicaos a reconocer la trayeutoria d’artistes y bandes que lleven años contribuyendo al desarrollu musical del país. D’esta manera, los Premios AMAS sigan cumpliendo col so oxetivu inicial: dar visibilidá al talentu musical fechu n’Asturies y reconocer tanto a los nomes consolidaos como a les nueves propuestes.
Ún de los momentos centrales de la gala foi la entrega de los AMAS Honoríficos, que nesta ocasión recayeron en Pauline en la Playa y na histórica voz de la tonada Mari Luz Cristóbal Caunedo. El reconocimientu a les hermanes Álvarez valió pa reivindicar una trayeutoria llarga y coherente na música asturiana, mientres que Mari Luz Cristóbal protagonizó unu de los momentos más emotivos de la nueche.
Más allá de los premios concretos, la gala volvió demostrar que la música n’Asturies vive un momentu especialmente creativu. Bandes y solistes de distintes xeneraciones compartieron escenariu nuna nueche que valió pa celebrar el trabayu de tol sector y pa confirmar que la escena musical asturiana sigue evolucionando ensin perder la so identidá.
PREMIOS:
This work is licensed under a Creative Commons Attribution 4.0 International License.
