La Coordinadora Ecoloxista d’Asturies va presentar alegaciones al nuevu proyectu mineru d’arcilla blanca en La Espina (Salas) que vien de salir a información pública nel BOPA

Turbera Molina

El plan contempla la apertura d’una nueva mina a cielu abiertu, lo que —según denuncien— podría tener importantes consecuencies ambientales, especialmente pa la Turbera de La Molina, un espaciu natural protexíu que quedaría a solo 12 metros de la esplotación prevista.

El proyectu, denomináu “Tras Zarrín”, plantea continuar la esplotación d’arcilles de gran blancura nuna superficie de 656.731 metros cuadraos nel Monte el Molinón, na lladera que s’estiende tres el Polígonu Industrial del Zarrín. Pa poder llevase alantre, sería necesario modificar la calificación urbanística de los terrenos, yá que l’actual Plan Xeneral d’Ordenación de Salas clasifícalos como suelo non urbanizable d’interés paisaxísticu y forestal. La propuesta pretende recategorizalos como suelo d’interés mineru.

Una de les principales preocupaciones tien que ver cola proximidá de la mina a la Turbera de La Molina, un ecosistema d’altu valor ecolóxicu compartíu polos conceyos de Salas y Tinéu. La esplotación prevista quedaría a namái 12 metros d’esti espaciu natural, que yá sufrió una perda significativa d’agua nos últimos años, según recuerden dende la Coordinadora.

La Turbera de La Molina ta declarada Zona Especial de Conservación (ZEC) dende’l Decretu 130/2014, de 17 d’avientu, pol que se declara la ZEC Turbera de la Molina (ES1200044) y s’aprueba’l so instrumentu de xestión, publicáu nel BOPA del 23 d’avientu de 2014.

Amás del so valor ambiental, esti espaciu tien tamién una gran relevancia histórica: nél descubriéronse les huelles más antigües d’estraición de minerales na Península Ibérica, con más de 5.000 años d’antigüedá, y posiblemente les más antigües documentaes n’Europa.

Les turberes son ecosistemes extraordinariamente escasos n’Asturies y na Cornisa Cantábrica y constitúin comunidaes relictes, vestigios de condiciones climátiques del pasáu. La Turbera de La Molina destaca pola presencia de flora rara y singular, como’l briófitu Sphagnum pylaesii, una especie presente en mui poques localidaes ibériques y catalogada como d’Interés Especial nel Catálogu Rexonal d’Especies Amenazaes de la Flora d’Asturies.

Esti espaciu cumple tamién un papel importante como refuxu temporal pa aves acuátiques ivernantes y como hábitat pa distintes comunidaes faunístiques, incluyíos endemismos del noroeste ibéricu.

Dende la Coordinadora Ecoloxista aseguren que’l proyectu nun garantiza la protección de la turbera, yá que —según señalen— nun inclúi midíes correctores suficientes pa asegurar la recarga de los acuíferos nin establece una zona perimetral amplia alredor del espaciu natural que permita caltener el so equilibriu hídricu.

Amás, recuerden otros impactos ambientales que, según denuncien, yá se dan en esplotaciones mineres similares del entornu, como la pérdida paisaxística, la contaminación del suelu, la afección a les agües o la contaminación del aire.

Por to ello, la Coordinadora Ecoloxista d’Asturies reclama que nun s’autorice esti nuevu proyectu mineru y que se priorice la protección d’un ecosistema que consideren clave pa la biodiversidá y el patrimoniu natural del occidente asturianu.

This work is licensed under a Creative Commons Attribution 4.0 International License.