El cantante, conocíu pola so implicación na causa nacionaliega irlandesa, fora acusáu pola Policía de Londres d’amosar n’ún de los sos conciertos una bandera de sofitu a Hizbullah, organización prohibida nel Reinu Xuníu

El raperu irlandés Liam Óg Ó hAnnaidh, conocíu artísticamente como Mo Chara y miembru del grupu Kneecap, nun tendrá que facer frente a un xuiciu por cargos de terrorismu depués de que’l Tribunal Superior de Londres refugara’l recursu presentáu pola Fiscalía británica.

La decisión confirma’l fallíu anterior que yá desestimara’l casu por un problema de procedimientu, un «fallu técnicu» rellacionáu col plazu nel que se presentó l’acusación.

El cantante fora acusáu pola Policía de Londres el 21 de mayu de 2025 depués de qu’amuesara una bandera de sofitu a Hizbullah, organización política y militar chií con base nel Líbanu, contraria a Israel y prohibida nel Reinu Xuníu. Los fechos tuvieron llugar mientres un conciertu celebráu’l 21 de payares de 2024 nel recintu O2 Forum, nel barriu londinense de Kentish Town.

La defensa del artista y la desestimación de la denuncia nun vieno de la man de la llibertá d’espresión nin del drechu internacional, comu podía deseyase, sinón que la denuncia foi desestimada por un tecnicismu llegal. Como la so defensa sostuvo dende l’entamu, la imputación presentárase fuera del plazu máximu de seis meses dende la presunta comisión del delitu. El fiscal xeneral británicu, Richard Hermer, ratificó l’acusación el 22 de mayu, un día depués de la fecha na que se formalizara, lo que llevó al xuez Paul Goldspring a anular los cargos el pasáu mes de setiembre.

La Fiscalía recurrió esa decisión en xineru, argumentando que’l procedimientu taba yá en vigor antes de la primer comparecencia xudicial del cantante. Sicasí, dos maxistraos del Tribunal Superior de Londres decidieron ratificar el fallíu anterior y refugaren l’apelación.

La sentencia conclúi que’l procedimientu contra’l rapero nun se punxo en marcha de forma llegal nin dientro del plazu que marca la Llei de Terrorismu británica, polo que’l casu queda anuláu y nun pue siguir alantre.

Tres conocese la decisión xudicial, la cuenta oficial de Kneecap en redes sociales publicó una imaxe de Mo Chara cola frase “I’m a free man” (“Soy un home llibre”). N’otra publicación compartieron una captura del casu acompañada del mensaxe: “Kneecap: 3, Gobiernu británicu: 0”.

Nel mesmu mensaxe, el grupu criticó con dures pallabres al Estáu británicu y añadió consignes como “Palestina llibre” y “Liberad los seis condados”, en referencia a los territorios que formen el norte d’Irlanda.

L’abogáu de la defensa, Darragh Mackin, del despachu Phoenix Law, celebró la resolución xudicial y calificó tol procesu como una «caza de bruxes llegalmente ridícula», añadiendo que’l dineru públicu podría gastase meyor que n’«xuicios inútiles y apelaciones costoses».

El grupu Kneecap, fundáu en 2017 en Belfast, algamó gran repercusión internacional en 2024 col llanzamientu de la so película biográfica. La formación denunció en delles ocasiones la situación en Gaza, una postura que, xunto col procesu xudicial por terrorismu, provocó cancelaciones de conciertos y restricciones d’entrada en dellos países, ente ellos Canadá.