Nun contestu d’avieyamientu aceleráu de la población, el coste mediu d’una residencia d’ancianos n’Asturies ronda los 2.100 euros mensuales, una cifra que cuasique duplica un SMI y que supera con claridá los ingresos de gran parte de la población pensionista
Munchos dependientes precisen una atención que les families nun pueden dar
El problema vese nidio al comparar el preciu de les residencies colos ingresos habituales de la población mayor. El Salariu Mínimu Interprofesional (SMI) ta fixáu en 1.134 euros mensuales en 14 pagues (1.323 en 12), bien per baxo del costu d’una plaza residencial.
Tampoco les pensiones cubren estos gastos, siendo necesaria una fuerte aportación familiar. La pensión media n’Asturies ronda los 1.600 euros mensuales, claramente perbaxo del costu mediu d’una residencia. La situación ye entá más complicada pa los que perciben les pensiones más baxes, mayormente muyeres, como munches pensiones de viudedá o non contributives, que pueden movese ente los 500 y los 900 euros mensuales.
El problema nun ye solo’l preciu, sinón tamién la falta de places públiques y concertaes. Esta escasez obliga a munches families a recurrir a residencies privaes con costes entá más elevados, asumiendo gastos que —según denuncien— deberían corresponder al sistema públicu de dependencia.
Per otru lláu, los tiempos de tramitación de la dependencia superen con frecuencia los 180 díes que marca la llei, llegando en munchos casos a retrasos de 340 o incluso 450 díes. Miles de persones siguen en llista d’espera en dalguna de les fases del procedimientu, y distintes estimaciones señalen que más de 11.000 persones morrieron n’Asturies dende 2017 esperando una ayuda a la que teníen drechu
Esta situación llevó a la Federación de Asociaciones Vecinales de Gijón a reclamar que s’aborde con urxencia’l problema de la dependencia y del accesu a les places residenciales. Les asociaciones vecinales reclamen al Gobiernu asturianu qu’adopte midíes estructurales: aumentar les places públiques, reducir los tiempos de tramitación y garantizar que les persones dependientes reciban les ayudes a les que tienen drechu en plazos razonables.
Llucía F. Marqués
This work is licensed under a Creative Commons Attribution 4.0 International License.
