Mientres Adrián Barbón s’enllena la boca diciendo que “los incendios del añu pasáu nun foron fortuitos”, el so gobiernu apreba un plan forestal que multiplica’l problema con un nidiu enfoque productivista, empobináu a favorecer a les industries madereres, que desprotexe la biodiversidá y los montes asturianos

El plan prevé ampliar el llantáu de coníferes alóctones

La Coordinadora Ecoloxista d’Asturies amosó la so fonda preocupación pol proyectu del nuevu Plan Forestal d’Asturies pa’l periodu 2027-2041. Dende la organización recuerden que yá intuíen la orientación d’estes propuestes, que se dexaren ver nel borrador del Plan d’Ordenación de los Recursos Forestales presentáu en 2024 y que finalmente nun llegó a concretase tres les graves oleaes d’incendios forestales rexistraes nos últimos años. 

Según la Coordinadora, dempués de presentar múltiples alegaciones nes distintes fases del procesu, el documentu nun amuesa un compromisu real col interés social nin cola protección ambiental de los montes asturianos. La organización considera que’l plan tien un claru enfoque productivista, algo que —aseguren— queda patente nel sofitu espresáu pol sector industrial de la maera al documentu provisional.

Los colectivos ecoloxistes temen que les prioridaes del plan se centren en satisfacer les demandes de les industries del papel y la maera, en llugar de garantizar la conservación de la biodiversidá. Señalen amás que, anque nel preámbulu del documentu se fala de reforciar la protección de los ecosistemes forestales, el conteníu real inclúi propuestes que podríen suponer una menor protección pa espacios naturales como parques y reserves.

Un de los aspectos que más esmolez a la Coordinadora ye la posibilidá que contempla’l plan d’introducir especies alóctones en determinaos espacios naturales. Ente les especies mencionaes tán el Eucalyptus nitens y otres como Cedrus atlantica, Cedrus libani, Cryptomeria japonica, Pinus taeda, Sequoia sempervirens o Sequoiadendron giganteum, especies que —apunten— nun tienen presencia forestal significativa n’Asturies más allá d’usos ornamentales.

Dende la organización ecoloxista advierten de que los cambios rápidos na cubierta vexetal, xunto colos efectos de los incendios forestales, pueden provocar graves perturbaciones nel mediu natural y afectar al equilibriu ecolóxicu de los montes. Amás, consideren que la posible sustitución de coníferes actuales por otres especies alóctones podría tener efectos difíciles de prever sobre la biodiversidá y el comportamientu de los ecosistemes forestales.

El plan tien un horizonte temporal de quince años, con revisiones cada cinco, lo que —según la Coordinadora— podría facilitar que futures alministraciones amplíen esta orientación productivista. Poro, el colectivu pide a los responsables políticos que revisen el plantegamientu del documentu y que prioricen una xestión forestal centrada na conservación de la biodiversidá y na mitigación de la crisis climática y ambiental.

Susana Sela