Entrar en Villaviciosa una hora anantes del manifestamientu yera, cenciellamente, imposible. Parte de la llucha feminista quedó atascada nel camín o dando vueltes buscando aparcamientu. La enorme afluencia de xente provocó retenciones nos accesos dende l’autovía y una caravana que retrasó  l’entamu de la movilización.

La villa maliaya convirtióse esti 8 de marzu nel epicentru de la movilización feminista n’Asturies. Ellí celebróse la manifestación del Día Internacional de la Muyer Trabayadora —anque na convocatoria munches vegaes se perdiera esi “trabayadora”, intuimos que non por casualidá— nun 8M que se convocó de forma unitaria baxo’l lema “Nin la tierra ni les muyeres somos territoriu de conquista”.

Dende primeres hores yera evidente que la convocatoria superaba les previsiones. A pesar de los atascos y de la xente que nun llegó nin a poder entrar na villa, les estimaciones falen d’unes 15.000 persones nuna xornada marcada pola masiva presencia de colectivos feministes, sindicales y sociales.

A les 12:30 empezó la concentración. Nel arranque de la xornada, Carmen Codesal, vocera d’Asturies Feminista 8M, revindicó la fuerza’l movimientu y recordó que “les feministes tenemos les mochiles enllenes d’argumentos pa impedir la marcha atrás de los drechos”. La movilización, que finalmente arrancó con retrasu pola situación del tráficu, percorrió les cais del centru de Villaviciosa anantes de tornar al puntu de salida pa la llectura del manifiestu.

La xornada volvió poner nel centru la reivindicación del papel de la muyer trabayadora y la necesidá de siguir organizándose frente a les desigualdaes estructurales. El manifiestu denunció la violencia machista y reclamó recursos contra toles formes de violencia —dende la económica y llaboral hasta la institucional o la dixital— al tiempu que recordó que “nun hai xusticia feminista ensin xusticia territorial”, poniendo en valor el papel de les muyeres del mediu rural.

Pero la movilización nun se llendó namái a esi mensaxe. Les cais de Villaviciosa amosaron el calter transversal del movimientu feminista n’Asturies. Xunto a les pancartes contra la violencia patriarcal o pola igualdá real, pudieron vese tamién mensaxes pola lliberación de les seis de La Suiza, contra la guerra y en defensa de Palestina, Cuba o Venezuela.

Nun faltaron tampocu les referencies al calter obreru y anticapitalista de la llucha feminista “Porque el feminismo tamién ye llucha obrera: por condiciones llaborales dignes, pola igualdá real y pol reconocimientu del trabayu invisibilizáu.”

Asina, ente atascos, pancartes moraes y miles de voces na cai, el 8M volvió demostrar n’Asturies que’l feminismou sigue siendo una movilización viva, amplia y profundamente venceyada a otres lluches sociales.

Como contrapuntu realista al subidón feminista, lleemos güei na prensa qu’una denuncia d’abusu contra una menor foi desestimada por falta de prebes, dándose más credibilidá a los testigos (collacios del presuntu agresor) que al relatu de la rapacina.

This work is licensed under a Creative Commons Attribution 4.0 International License.