L’Ingresu Mínimu Vital (IMV) del Estáu y el salariu social básicu del Principáu d’Asturies creáronse col mesmu oxetivu: evitar que miles de families quedaren ensin recursos pa vivir. Pero nos últimos años cada vez hai más casos nos que estes ayudes acaben convirtiéndose nun auténticu problema, afogando a los sos perceptores nuna telaraña de deldes y obligaciones de la que cuesta salir

Per un llau, el cálculu de la prestación faise acordies a los ingresos del añu anterior, asina que si un beneficiariu trabayó, pongamos por casu, tres meses en 2024, declarándolo na renta de 2025, percibirá menos paga en 2026. Ello lleva a munches persones a decidir nun aceptar trabayos temporales por mieu a que se-yos rebaxe la cuantía nun futuru, desincentivando la busca d’emplegu. Pero amás tendrán que devolver lo que cobraron “de más” esos meses por parte del IMV, y esa información nun llega nel momentu nin nel añu siguiente, sinón nuna fecha aleatoria del futuru, inclusive años más tarde.

Les reclamaciones por cobros “indebíos” lleguen polo xeneral meses o años dempués de cobrar la prestación y suponen devolver miles o decenes de miles d’euros. En munchos casos, según denuncien asociaciones sociales y distintos fallos xudiciales, les families nun cometieron nenguna irregularidá: el problema ta na propia xestión administrativa.

A nivel estatal, la Seguridad Social lleva años reclamando devoluciones del Ingresu Mínimu Vital. En munchos casos, estes reclamaciones surden cuando l’Alministración revisa los ingresos reales d’una familia y conclúi que recibió más de lo que-y correspondía. Nun falamos de xente que s’arriqueciera a costa del IMV, falamos de families nes que ún de los miembros trabayó temporalmente un par de meses, que percibieron una beca o a les que se-yos contabiliza’l cobru de la manutención polos fíos —anicialmente escluyida del cómputu d’ingresos—. Otru casu típicu ye’l de les families nes que ún de los miembros marcha de casa y, pese a comunicalo oficialmente, l’Alministración nun adecua correchamente les cantidaes en meses o años, pa reclamar dempués tolo acumulao de golpe. O, a cencielles, errores de cálculu por parte de l’Alministración.

A nivel asturianu, col Salariu Social, la situación ye la mesma: una familia comunica que cambió la so situación —por exemplu, porque entamó a cobrar el IMV o porque consiguió un emplegu—. Pero hasta que l’Alministración resuelve oficialmente l’expediente, la prestación sigue pagándose. Les cuantíes son en sí mesmes tan escases que la persona que les recibe considera que tien drechu a les dos, siendo ello que sumaes cubren malpenes les necesidaes familiares. Cuando finalmente llega la resolución, meses o años dempués, l’Alministración reclama la devolución de tol dineru que se siguió cobrando nel entemediu.

Los expertos y organizaciones sociales avisen de que esto crea una situación especialmente complicada: families ensin capacidá d’aforru tienen que facer frente a deudes inesperaes. En delles ocasiones la devolución impónse directamente descontando parte de la prestación que la familia sigue cobrando, lo que puede amenorgar notablemente los ingresos mensuales del llar, al tiempu que xenera una dependencia absoluta d’estes ayudes. 

Cuando los afeutaos tienen la capacidá de denunciar estes situaciones, son munchos los casos nos que los tribunales acaben anulando estes deudes, probando que l’error foi de la propia Alministración. Sicasí, interponer estes demandes requier un conocimientu y un ánimu que non siempre se tien. Nesi sen ye perimportante’l llabor de l’Asociación Alambique (Xixón) como informadora y acompañante nos procesos de reclamación.

Un exemplu ye’l casu d’una muyer asturiana a la que se-y reclamaron cuasi 6.000 euros del IMV, devolución que finalmente anuló la xusticia al considerar que l’error correspondía a la Seguridad Social. Pero hai casos más complicados: dalgunos expedientes acumulen reclamaciones de distintes prestaciones. Nun casu espublizáu en prensa, una beneficiaria tuvo que facer frente a la reclamación de 5.784 euros del IMV y otros 10.336 euros del salariu social básicu, al considerar l’Alministración que los cobros nun correspondíen.

La deficiente xestión del Salariu Social Básicu n’Asturies llegó inclusive al Defensor del Pueblu por retrasos na revisión de les circunstancies de los beneficiarios.

Según denunció l’Asociación Alambique ante’l Defensor del Pueblu, el retrasu na actualización de datos provoca que se acumulen cantidaes mui elevaes que les families tienen que devolver dempués.

La Conseyería de Drechos Sociales defendió que la normativa permite reclamar estes cuantíes hasta cuatro años dempués, pero’l Defensor del Pueblu considera qu’esi procedimientu nun tien en cuenta la situación real de les persones afectaes.

La institución recuerda que munchos beneficiarios actúen de bona fe y que los retrasos administrativos acaben agravando la precariedá económica de families que yá partíen d’una situación mui vulnerable. Por eso recomendó reformar el procedimientu y establecer un plazu máximu pa reclamar el reintegru cuando’l retrasu seya responsabilidá de l’Alministración.

La situación abre un alderique de fondu sobre’l furrulamientu del sistema de protección social.