Ayeri, 3 de marzu, celebróse nel Muséu de la Sidra d’Asturies (Nava) l’actu d’entrega de los Premios del 32 Campeonatu d’Echadores d’Asturies 2025, entamáu un añu más pol Conseyu Regulador de la DOP Sidra d’Asturies y l’Asociación d’Escanciadores de Sidra d’Asturies (AESA).

Salvador Ondó recibe’lpremiu de manes del Presidente de la DOP Sidre d’Asturies, Jorge García, y Begoña López, directora xeneral d’Agricultura, Agroindustria y Desendolcu Rural

Nel eventu reconocióse a los diez primeros clasificaos d’esta última edición del campionatu. Toos ellos recibieron el so diploma acreditativu, amás d’un premiu n’efectivu pa los trés primeros clasificaos. Tamién se premió a los trés meyor puntuaos de la categoría sub-25 y a los meyores equipos de sidreríes.

El gran protagonista de la xornada foi Salvador Ondó (Tierra Astur), que llevantó nel Muséu de la Sidra de Nava’l so séptimu títulu de meyor echador d’Asturies, consolidándose como una de les figures más destacaes na hestoria del Campeonatu.En segundu puestu, el so etenru rival, Wilkin Aquiles (La Montera Picona), otra de les grandes figures del panorama sidreru.

Nel mesmu actu tamién se reconoció a Amauris La Pauta (Tierra Astur) como meyor escanciador na categoría de menores de 25 años, y a La Montera Picona de Ramón (Xixón) como meyor equipu de sidrería.

L’actu cuntó cola participación de distintes autoridaes. Jorge García, presidente del Conseyu Regulador de la DOP Sidra d’Asturies, destacó’l valor simbólicu d’echar la sidre dientro de la Cultura Asturiana de la Sidre:

“Si hai un iconu que identifique la sidra d’Asturies ye l’escanciáu. Si hai algo que tenemos que protexer y potenciar dientro del mundu de la sidra ye l’escanciáu: ye únicu a nivel mundial. Protexámoslu, potenciémoslu y difundámoslu”.

Pela so parte, Begoña López, directora xeneral d’Agricultura, Agroindustria y Desendolcu Rural, fixo fincapié na dimensión cultural y social de la sidre y na importancia d’esti tipu d’iniciatives pa dar visibilidá a Asturies:

“La sidra nun solo se bebe, vívese, compártese y entiéndese”.

La responsable autonómica destacó que “concursos como esti ponen a Asturies nel mapa”, ensin escaecer na so intervención el papel fundamental de los collecheros, que constitúin la base de la cadena productiva de la sidra.

Tamién tomó la pallabra Juan Cañal, alcalde de Nava, que fixo un reconocimientu especial a les entidaes que patrocinen el concursu —la DOP Sidra d’Asturies y la Fundación Caja Rural— y resaltó la importancia de la formación como ferramienta pa tresmitir y caltener viva esta tradición.

El campeón d’esta edición, Salvador Ondó, destacó que’l so ésitu ye frutu del esfuerzu continuu:

“Ye’l trabayu y la constancia; equí nun hai suerte”.

Ondó tamién fixo referencia al altu nivel de la nueva xeneración d’echadores:

“Lo más difícil ye competir colos chavales que vienen, que lleguen con más ganes y les ilusiones más altes. Ye difícil; tenemos qu’afinar y esforzanos cada vez más pa competir con ellos”.

Amás, el campeón resaltó la importancia de la formación que se fae en Tierra Astur, que contribúi a preparar a nuevos profesionales y a caltener el nivel nes futures xeneraciones.

Clasificación xeneral

1. Salvador Ondó (Tierra Astur)

2. Wilkin Aquiles (La Montera Picona)

3. Jorge Vargas (La Montera Picona)

4. Amauris La Pauta (Tierra Astur)

5. Melisa Bellón (Tierra Astur)

6. Antonio Sorca (El Portal)

7. Pelayo Rodríguez (La Montera Picona)

8. Jonathan Trabanco (Los Portales de Jaminón)

9. Isabella Padrón (Bodegas Anchón)

10. Pablo Suárez (Tierra Astur)

Categoría Sub-25

1. Amauris La Pauta (Tierra Astur)

2. Isabella Padrón (Bodegas Anchón)

3. Melisa Bellón (Tierra Astur)

Meyor equipu d’escanciadores

1. La Montera Picona de Ramón (Xixón)

2. Sidrería Tierra Astur (Uviéu)

3. Sidrería El Portal (Villaviciosa)

4. Sidrería Fuente Villoria (Llugones)

This work is licensed under a Creative Commons Attribution 4.0 International License.