Ante l’abandonu dafechu de la cuestión llingüística por parte de los partios d’ámbetu español, ERC preséntase comu defensor de les llingües del estáu, ensin escaecer l’asturianu

Francesc-Marc-Alvaro defenderá la proposición

La formación catalana Esquerra Republicana de Catalunya (ERC), compañera d’Andecha Astur na coalición Agora Repúbliques, presentó nel Congresu los Diputaos una Proposición Non de Llei (PNL) pa que les radiofórmules musicales d’ámbitu estatal emitan, de manera obligatoria, un mínimu del 5 % de música n’asturianu, catalán, euskera, gallego, valenciano y occitanu. La iniciativa va ser defendida na Comisión de Cultura pol diputáu Francesc-Marc Álvaro.

Más allá del debate xeneral sobre les llingües cooficiales, la propuesta tien una especial relevancia pa l’asturianu. La presencia de música na nuesa llingua nes grandes cadenes estatales ye prácticamente testimonial, por nun decir nula. Establecer una cuota mínima supondría abrir una ventaxa estable pa grupos y intérpretes qu’apuesten por crear n’asturianu, favoreciendo el so espardimientu y contribuyendo a la normalización social del idioma.

La radio musical sigue siendo un altavoz decisivu pa marcar tendencies y crear referentes culturales. Si l’asturianu nun suena, nun esiste nel imaxinariu colectivu estatal. Una cuota del 5 % permitiría visibilizar la producción musical asturiana y dignificar la llingua como vehículu válidu de creación contemporánea.

Pa l’asturianu, esta iniciativa podría significar un pasu más na reivindicación d’igualdá. Si bien ye imprescindible, la normalización nun s’algama namái col reconocimientu institucional, sinón tamién cola presencia efectiva na sociedá, nos medios de comunicación y na industria cultural.

Que la música n’asturianu tenga un espaciu garantizáu nes radios estatales supondría reforzar la so dignidá y el so prestíu social. Ye, en definitiva, una cuestión de drechos culturales y de reconocencia d’una realidá llingüística que forma parte del patrimoniu común.

Llucía F. Marqués