El Conceyu Carreño amosó esti día’l so compromisu col pueblu saharaui colgando na Casa Consistorial la bandera de la República Árabe Saharaui Democrática (RASD), cuando se cumplen 50 años de la so creación y del nacimientu de la institucionalidá saharaui.
Mural memorialista en Candás
Dende la Casa Conceyu partió una marcha escontra’l paséu marítimu de Candás, onde lluz un mural dedicáu al pueblu, la cultura y la resistencia saharaui, obra del artista Goyo Rodríguez. La intervención artística convierte’l muriu nun espaciu de memoria y revindicación, venceyando l’arte col compromisu internacionalista.
Les actividaes d’esti aniversariu valieron pa reclamar el drechu del pueblu saharaui a la so independencia, vindicando’l drechu al autodetermín comu innegociable pa tolos pueblos. Dende la concentración denuncióse la traición d’España a esti pueblu y les complicidaes d’empreses y instituciones que financien y se beneficien de la economía de la ocupación, contribuyendo al espoliu de los recursos naturales del Sáhara Occidental. Asina mesmu, amosóse’l refugu a les actitúes claudicantes de los gobiernos españoles, que —llueu de asumir la so responsabilidá como potencia alministradora— s’allinien col Estáu ocupante, Marruecos, incumpliendo les normes del drechu internacional en materia de descolonización que dicen respetar.
La xornada vien precedida d’otres iniciatives de sensibilización. El día anterior al aniversariu presentárase en Mieres el cómic de Mauro Entrialgo, una obra qu’avera la realidá saharaui al públicu dende la narrativa gráfica.
Ente les persones asistentes al actu en Candás atopábase Bachir Lehdad, escritor reconocíu y antiguu delegáu del Frente Polisario n’Asturies. Nun de los sos poemes, recueye’l sentimientu d’un pueblu que resiste nel exiliu y na espera:
Nun pueo desplicáte lo que siento,
ye un dolor tan vieyu como’l vientu.
L’arena guarda histories ensin escaezu,
d’un pueblu qu’entá suaña col so abellugu.Lluchamos pol sol y la xusticia,
suañamos col día en que la brisa
traiga al desiertu paz y llibertá,
y l’exiliu seya namái un mal suañu más.Pa resistir, pa nun cayer,
pa alzar la voz y renacer.
Anque’l muriu seya un golpe al coral,
la mio xente nunca dexa de cantar un canciu.Les dunes son testigos de la espera,
y la lluna qu’alluma la bandera.
En cada h.aima hai fuercia y hai consuelu,
y un futuru que relluma ente los cielos.Nel Sáhara llátia la esperanza,
en cada pasu buelgues de confianza.
Y anque la nueche seya fría ya ensin final,
el riscar prométenos el nuesu llar.La mio tierra nun s’escaez nin se vende,
la mio llucha ye pola mio patria independiente.
Y si la vida quier que me rinda,
que’l vientu lleve lloñe la mio consigna.Pa resistir, pa conquistar
lo que dalgún día foi y volverá a rellumar.
Sobre’l desiertu arderá la llibertá,
y el mio pueblu atopará la so verdá.
Carreño reafita asina los venceyos de solidaridá col pueblu saharaui, nun aniversariu que nun ye solo conmemoración histórica, sinón tamién llamada colectiva a la xusticia y a la descolonización pendiente.
This work is licensed under a Creative Commons Attribution 4.0 International License.
