El Conceyu de Xixón activa -con retrasu- el protocolu anticontaminación nel nivel 0 na zona Oeste, tres les denuncies presentaes pola Coordinadora Ecoloxista pola mala calidá del aire rexistrada nos caberos díes.

La contaminación ye visible dende los llares xixoneses

Nestos momentos los datos informen de que sigue n’estáu Desfavorable la contaminación por partícules de menos de 2,5 micres (PM 2,5) nes estaciones de Pumarín, Montevil y El Lloredal, mentes que la calidá del aire ye Regular en Roces y La Calzada.

Tamién continúa en estáu Desfavorable la contaminación por partícules de menos de 10 micres (PM10) nes estaciones de Pumarín y El Lloredal. Nesti casu, los niveles son Regulares en Roces, Montevil y La Calzada.

El Plan d’Aición municipal contempla l’adopción d’un protocolu específicu d’actuación n’episodios de contaminación del aire pa la zona oeste de Xixón, yá que’l protocolu autonómicu vixente nun s’activaría nes situaciones concretes detectaes, como les d’estos díes.

Dende los coleutivos vecinales y ecoloxistes declaren qu’esperen qu’esta declaración nun quede en pallabres y que s’apliquen polo menos les midíes más significatives recoyíes nel nivel 0.

Ente elles destaquen avisar a les empreses asitiaes na zona onde s’activa’l protocolu y que operen baxo una Autorización Ambiental Integrada (AAI) o como Actividaes Potencialmente Contaminadores de l’Atmósfera (APCA), pa que adopten midíes de reducción d’emisiones, tanto les xenerales que marca’l protocolu como les específiques de la so autorización ambiental; regar carreteres nos tramos que determine la Comisión de valoración y siguimientu del protocolu. Amás, nes actividaes desendolcaes en zones portuaries, les empreses deberán humectar de manera permanente los acopios de graneles, viales y demás focos d’emisión difusa, tanto nes autorizaciones y concesiones como nes zones de muelle comercial (cintes tresportadores, zones de carga y descarga, etc.), amenorgando la carga, descarga, tresiegu y tresporte de material pulverulentu al mínimu indispensable pa caltener la operatividá del puertu y de les actividaes venceyaes a estes operaciones.

La evolución de los niveles de partícules nos próximos díes marcará si ye necesario escalar a niveles superiores del protocolu.

This work is licensed under a Creative Commons Attribution 4.0 International License.