Esti vienres 27 de febreru inaugúrase en Komono Gallery la esposición coles obres creaes nel marcu d’Artístiques, un proyectu cultural que xune creación artística, mocedá, feminismu y diversidá llingüística. La galería carbayona amuesa les diez pieces pictóriques realizaes en direuto por artistes xóvenes asturianes nel festival entamáu por Puru Remangu.

El 29 de payares de 2025, los Kuivi Almacenes d’Uviéu acoyeron Artístiques, un eventu pioneru y de baldre que combinó artes escéniques, música y artes plástiques. La mayor parte de les obres fueron creaes espresamente pa esa cita y toles artistes participantes —cerca de cuarenta— fueron muyeres xóvenes que usaron la llingua propia del so territoriu como vehículu d’espresión artística. La iniciativa destacó por venceyar creación cultural contemporánea, perspectiva feminista y visibilización de les llingües minorizaes.

Agora, Artístiques da un pasu más cola esposición que s’abre esti vienres en Komono Gallery (Cai Fontán, 17), onde van poder visitase a lo llargo del mes les diez obres pintaes en vivo durante’l festival. Les artistes participantes nesta muestra son María Ortiz, Luzia Pedregal, Iratxe Esteve, Juls, Inés Benito, Clara Nieto, Celia Pandiella, Dido Carrero, la estudiante de la ESAPA Raquel Mañana y Lucía Álvarez, de la Escuela d’Arte d’Uviéu. Toles pieces, sobre llenzu, tán rellacionaes cola filosofía d’Artístiques —muyer, mocedá y diversidá cultural— y van tar disponibles pa la venta.

La inauguración va tener llugar el vienres a les 19 hores. L’actu, entamáu por Puru Remangu, impulsora del proyectu xunto a Ixuxú Cultura, va contar cola presencia de dalgunes de les artistes participantes, una sesión musical a cargu de la DJ La Junta Culata —alcuñu de Lidia Friera— y bebida por cortesía de Pico Fino, Fuensanta y Santa Cerveza. La entrada ye llibre.

Artístiques continúa

Anque Artístiques nació como festival y algamó un notable ésitu —con más de 500 persones asistentes—, les sos promotores decidieron dende’l principiu que se trataría d’una edición única. Sicasí, el proyectu va siguir vivo n’otros formatos. Puru Remangu caltien la voluntá de siguir trabayando baxo la marca Artístiques como paraguas d’iniciatives que promuevan la creación cultural fecha por muyeres y/o n’idiomes minorizaos, una llinia de trabayu que va tener continuidá a lo llargo de 2026 con nueves propuestes que van dir anunciándose.

Susana Sela

This work is licensed under a Creative Commons Attribution 4.0 International License.