Les seiciones sindicales de CNT Candás y CNT Uviéu anuncien l’entamu d’una campaña de denuncia y movilización contra la cadena hotelera NH, anguaño operando baxo la marca Minor Hotels, pola vulneración de drechos llaborales y pola degradación del serviciu a la clientela.
CNT anuncia la so campaña en redes.
Según denuncia la organización sindical, tres más d’un añu de conflictu llaboral, la empresa optó pola represión sindical como respuesta a les revindicaciones, procediendo al despidu de dos de les persones más actives na defensa de los drechos de la plantilla. Dende CNT afírmase qu’estos despidos busquen desactivar la organización sindical dientro de la empresa.
El sindicatu declara que, pesi estes midíes, CNT sigue activa na empresa y que la llucha va caltenese hasta que se produzca la reincorporación inmediata de les compañeres despidíes y s’atiendan les demandes plantegaes. “Esto nun ye negociable: ye un drechu”, señalen dende l’organización.
La campaña tamién pon el focu nel modelu empresarial de la cadena hotelera. CNT denuncia que los beneficios económicos nun proceden d’una meyora real del serviciu, sinón d’una estratexa basada na mercadotecnia y nel recorte sistemáticu de costes. Según el sindicatu, véndese una imaxe de resort de lluxu mientres se sostién la explotación de les plantilles y se perxudica a la clientela.
Ente les práutiques denunciaes tán les plantilles baxo mínimos, l’alta rotación del personal pa evitar la organización sindical, los despidos sumarios de quien protesta, la contratación de persones en situación de vulnerabilidá, servicios mermaos, salarios baxos, hores estra ensin pagar, falta de control horariu y categoríes llaborales non reconocíes.
Dende CNT faise un llamamientu públicu a la solidaridá, recordando que los clientes “nun son billeteres” y que les trabayadores “nun son esclavos”, y anuncien que la campaña va siguir visible hasta llograr una solución xusta al conflictu.
Llucía F. Marqués
This work is licensed under a Creative Commons Attribution 4.0 International License.
