El conflictu polos permisos d’investigación minera en Peñamayor sumó esti martes un nuevu episodiu de movilización social. Un total de 3.321 firmes foron presentaes ante la Dirección Xeneral de Mines pa espresar la refuga a los proyectos solicitaos por ASTURMET Recursos S.L., que afecten a los conceyos de Bimenes, Llaviana, Nava y Piloña.

Documentu de rexistu de les firmes

«Nun falamos d’un terrén baleru: equí hai agua, monte, pueblos y vida rural»

La entrega de les 3.321 firmes tuvo llugar ante la Dirección Xeneral de Mines, en Llamaquique, n’Uviéu, y contó cola presencia de representantes vecinales de los cuatro municipios implicaos. Decenes de persones acompangaron l’actu con pancartes y mensaxes en defensa del territoriu baxo’l llema “Salvemos Peñamayor”.

Dende la plataforma vecinal Salvemos Peñamayor recuerden que los permisos d’investigación minera suponen, na práctica, una puerta abierta a futures esplotaciones. “Ye un coladeru que permite llegalizar actividaes mineres de gran impactu ensin alderique real nin sofitu social”, vienen denunciando dende hai meses.

El colectivu señala que les autorizaciones se tramitaron d’espaldes a la vecindá, ensin información clara nin participación pública, lo que xeneró un esmolecimientu xorreciente nes zones afectaes. Al so xuiciu, caltener vixentes estos permisos supón someter Peñamayor a una amenaza constante.

“Nesti espaciu hai regatos, montes, pueblos, caminos, paisaxe, memoria colectiva y actividaes económiques venceyaes al mediu rural”, sorraya la plataforma, que refuga la idea de considerar la zona como un espaciu disponible ensin valores que protexer.

Amás de rexistrar les firmes, Salvemos Peñamayor esixe que s’incorporen de manera efectiva al espediente alministrativu, que se tenga en cuenta la oposición social ya institucional espresada y que s’atiendan los escritos presentaos pola ciudadanía. Tamién reclama qu’abra’l procedimientu de caducidá del permisu conocíu como “Astur A”, al considerar que podría tar incumpliendo la normativa vixente.

El colectivu recuerda qu’esti posicionamientu nun ye nuevu nin anecdóticu. La Xunta Xeneral d’Asturies y dellos plenos municipales, como los de Llaviana y Bimenes, yá se posicionaron a favor de la revocación o caducidá del permisu, ensin que hasta agora se produxera una respuesta clara por parte del Gobiernu del Principáu.

Pa la plataforma, el casu de Peñamayor pon enriba la mesa un modelu de xestión del territoriu que pon en riesgu’l futuru del mediu rural y reclamen soluciones darréu por parte de l’Alministración autonómica.

This work is licensed under a Creative Commons Attribution 4.0 International License.