L’ausencia del asturianu  nel estand del Principáu d’Asturies na cabera edición de la Feria Internacional de Turismu (FITUR) nun ye un fechu esceicional, sinón un exemplu más de la tónica habitual de desconsideración que los entes gubernamentales asturianos vienen calteniendo.

La cartelería de Gascona, nel stand d’Uviéu, foi la única presencia del asturianu

Nel recintu oficial d’Asturies en Madrid nun s’emplegó l’asturianu -nin central nin eonaviego-  en dengún elementu comunicativu, nin siquiera nel mesmu llogotipu institucional “Principáu d’Asturies”, que sí apaecierea n’otros años.

La situación foi treslladada a la entidá pola vía del Buzón del Asturianu, una ferramienta habilitada na so páxina web pa recoyer quexes, reclamaciones y tamién reconocencies rellacionaes col usu social ya institucional del idioma. Delles persones asistentes a la feria turística puxeron asina de manifiestu’l so malestar pola desapaición total de la llingua propia nun espaciu clave de promoción esterior.

La presidenta d’Iniciativa pol Asturianu, Arantza Margolles, calificó lo asocedío como “un pasu atrás más” nel procesu de normalización y recordó que la promoción turística ye un ámbitu nel que l’idioma pue actuar como elementu diferenciador y como valor amestáu. “Nun ye verdá que l’usu de la llingua propia espante visitantes; otres comunidaes con llingua propia demuéstrenlo de manera constante”, señaló.

Nesi sen, Margolles citó l’exemplu de Galicia, onde la promoción turística institucional faise d’avezu en gallegu, incluyida la del Xacobeo a nivel estatal, “ensin qu’ello supunxera nenguna perda de pelegrinos nin problemes pa los visitantes”. Pa la responsable del colectivu, l’usu del idioma propiu contribúi a crear una marca reconocible y singular, daqué que n’Asturies se sigue desaprovechando.

Dende Iniciativa pol Asturianu recuerden amás que la exclusión del asturianu en FITUR contradiz los criterios llingüísticos aprobaos pol mesmu Gobiernu del Principáu en febreru de 2024. Esos criterios afiten, nel apartáu dedicáu a la comunicación xeneral, que s’ha favorecer la integración del asturianu xunto col castellán en tolos mensaxes y actuaciones del sector públicu.

El colectivu revindica finalmente un cambéu real de política y confía en que nes próximes ediciones de FITUR se dea un xiru a esta dinámica. Nun se trata, sorraya l’asociación, d’un xestu simbólicu aislláu, sinón de cumplir colos compromisos asumíos y de poner fin a una práctica de despreciu que, llueu de FITUR, vuelve repetise una y otra vegada.

Susana Sela