Al tiempu que l’alcalde de Siero ufre terrenos a la Universidá Privada, el Centru d’Educación de Persones Adultes (CEPA) continúa ensin espaciu dende’l so desagospiu va más d’un añu

La sede de la Escuela d’Adultos baltóse va más d’un añu

El CEPA de Sieru ye un serviciu públicu esencial. Nél fórmense persones trabayadores, persones en desemplegu, migrantes, xente mozo que nun pudo completar los sos estudios y persones adultes en xeneral que deciden retomar la formación pa meyorar les sos condiciones de vida y d’emplegu. La educación a lo llargo de la vida ye, amás, un elementu clave pa la cohesión social y la igualdá d’oportunidaes, principios recoyíos nes polítiques educatives autonómiques y estatales.

Sicasí, más d’un añu dempués de ser desagospiáu de la so sede histórica, el centru d’adultos sigue ensin una ubicación estable y digna, desenvolcando la so actividá de manera provisional nun espaciu reducíu del IES Río Nora, con consecuencies negatives tantu pal propiu CEPA como pal institutu.

La solución provisional nel IES Río Nora nun solo nun resuelve’l problema, sinón que xenera otros nuevos. El institutu viose obligáu a ceder aules y dependencies necesaries pal so alumnáu, lo que repercute negativamente nel desendolcu normal de l’actividá docente. Caltener esta situación nel tiempu, denuncien dende’l sindicatu d’ensiñantes, Suatea supón consolidar la precariedá y debilitar dos servicios públicos al tiempu.

Esti escenariu contrasta cola disposición del Conceyu de Sieru a facilitar la implantación de proyectos universitarios privaos mediante la cesión de suelu públicu, una llinia d’actuación que vien siendo recoyida en distintos medios de comunicación d’ámbitu asturianu nos últimos meses. Pa distintes organizaciones sindicales y sociales, esta diferencia de tratu evidencia un duple raseru nel establecimientu de prioridaes.

L’alcalde Ángel García González, defende la ‘oportunidá’ de captar inversiones privaes nel ámbitu universitariu a traviés de la cesión de suelu públicu pa estos proyectos, fomentando un modelu elitista, basáu na mercantilización de la educación y desplazando la inversión necesaria na rede pública. 

La demanda concreta ye d’una sede digna y estable pal CEPA de Sieru; un compromisu presupuestariu que garantice’l so furrulamientu en condiciones adecuaes; el fin de la solución provisional nel IES Río Nora; y tresparencia absoluta en cualquier operación de cesión de suelu públicu. La demanda xenérica, priorizar lo público frente a lo privao. Si hai espaciu y voluntá política, la prioridá —afirmen dende Suatea— debería ser reforzar la educación pública y asegurar el futuru d’un serviciu esencial pa la ciudadanía.

Susana Sela

This work is licensed under a Creative Commons Attribution 4.0 International License.